Elordada demalys kúnderi mas kúıde 38 júrgizýshi ustaldy – polıtsııa
NUR-SULTAN. QazAqparat – Elordada demalys kúnderi mas kúıde kólik tizgindegen 38 adam ustalyp, olardyń bári de júrgizýshi kýáliginen aıyryldy, dep habarlaıdy QazAqparat tilshisi.
«Mas júrgizýshi – qylmysker» atty jedel aldyn alý sharalarynyń nátıjesinde jol erejesin buzǵan 743 adam ustalǵan. Onyń 38 jaǵdaıynda júrgizýshilerdiń mas kúıde kólik aıdaǵany anyqtalǵan. Kommýnaldyq aıyp turaǵyna 49 kólik jetkizilgen.
«Máselen jeksenbi kúni túngi saǵat eki jarymda patrýldy polıtsııa narıady JúNájimedenov pen Sh.Qaldaıaqov kóshesiniń qıylysynda «GAZ 3302» avtokóligin toqtatty. Avtokólik tizginindegi 18 jastaǵy jigittiń mas ekeni belgili boldy. Jas jigit medıtsınalyq kýálandyrýdan ótti. Narkolog-dárigerdiń qorytyndysy boıynsha júrgizýshi jeńil dárejede mas bolǵan», - dep habarlaıdy qalalyq polıtsııa departamentinen.
Ustalǵan júrgizýshilerge qatysty Ákimshilik kodekstiń 608-baby 1-bóligi (Júrgizýshiniń kólik quralyn alkogoldik, esirtkilik jáne (nemese) ýytqumarlyq masań kúıde basqarýy, sol sııaqty kólik quralyn alkogoldik, esirtkilik jáne (nemese) ýytqumarlyq masań kúıdegi adamnyń basqarýyna berý) boıynsha ákimshilik hattama toltyrylyp, olardyń kólikteri kommýnaldyq aıyp turaǵyna áketildi.
Sot qaýlysyna sáıkes olardyń bári kólikti 7 jyldan 15 jylǵa deıin júrgizý quqyǵynan aıyryldy.
