Elordada demalys kúnderi qaıda barýǵa bolady
NUR-SULTAN. QazAqparat - Osy demalys kúnderi elordalyq teatrlar kórermenderge tanymal spektakldar men premeralyq qoıylymdar usynady. Tıisinshe karantın shekteýleri men sanıtarlyq normalar saqtalady, dep habarlaıdy qala ákimdiginiń resmı saıty.
Elordada Qýyrshaq teatry 6 aqpanda saǵat 12:00, 14:00 jáne 16:00-de jas kórermenderdi T.Hasanǵalıevanyń «Qys týraly ertegi» ertegisine shaqyrady.
M. Gorkıı atyndaǵy Memlekettik akademııalyq orys drama teatry osy senbi jáne jeksenbi kúnderi «Narodnaıa kadrıl» lırıkalyq komedııasyn usynady. Qoıylym saǵat 18:00-de bastalady.
6 aqpan kúni saǵat 16:00 jáne 19:00-de NOMAD City Hall-da Oralhan Bókeıdiń «Aýyl hıkaıalary» dramasy kórsetiledi.
Aıta ketý kerek, is-sharalardyń bári sanıtarlyq normalar men karantın talaptaryn qatań saqtaı otyryp júrgiziledi.
