Elordada «Demalys-Astana» VII halyqaralyq týrıstik kórmesi ótýde

«ITECA» kompanııasynyń atqarýshy dırektory ıÝrıı Borodıhınniń aıtýynsha, «AstanaLeisure» kórmesi 2011 jyly Astana men Almatyda ótetin 7-shi Qysqy Azııa oıyndarynyń qurmetine arnalyp ótkizilip otyr.

Bul shara respýblıkanyń barlyq óńirindegi, taıaý jáne alys shetelderdegi týrıstik ındýstrııa kompanııalarynyń basyn qosatyn iri kásibı týrıstik oqıǵa ekendigin nazarǵa alǵan ıÝ. Borodıhın, «bıylǵy kórmege jergilikti jáne halyqaralyq baǵyttarda qyzmetter usynatyn Qazaqstan, Brazılııa, Malaızııa, Túrkııa, Qytaı, Soltústik Afrıka, Taıland, Ýkraına, Chehııa men Shveıtsarııa elderinen 50-den astam kompanııa qatysýda», dep habarlady.

Onda sońǵy týrıstik ónimder, áýe kompanııalarynyń arnaıy usynystary jáne týrıstik naryqtaǵy memlekettik qurylymdardyń qyzmetteri tanystyrylady. Sondaı-aq ulttyq stendter qoıylǵan. Kórme aıasynda qazaqstandyq týrıstik uıymdar ózderiniń sheteldik áriptesterimen iskerlik kelisimder jasaýǵa qol jetkizetin bolady.

Kórmede Qazaqstannyń Týrızm jáne sport mınıstrliginiń stendi ortalyq stendi bolyp usynylǵan. Onda Azıada - 2011 sharasy tolyq kólemde nasıhattalýda. Al oblystyq jáne Astana men Almaty qalalarynyń basqarmalarynyń stendteri óńirlerdegi ulttyq týrısttik áleýetti kórsetýge baǵyttalǵan. Árbir aımaqtyń shıpajaılary men demalys oryndary, jalpy týrıstik ındýstrııalary jóninde keń maǵlumat jınaqtalǵan.

Kórmeniń betasharyn jasaǵan Týrızm jáne sport vıtse-mınıstri Qaıyrbek Óskenbaev mınıstr Temirhan Dosmuhambetovtiń kórme qatysýshylaryna arnalǵan quttyqtaýyn oqyp berdi. «2011 jyly Astana men Almatyda ótetin 7-shi Qysqy Azııa oıyndarynyń qarsańynda ótip jatqan kórme týrızm ındýstrııasynda strategııalyq qorlardy shoǵyrlandyrýǵa múmkindik beredi. Qatysýshy kompanııalar óziniń qyzmeti men ónimderin usynyp qana qoımaı, Qazaqstan naryǵynda bekem ornyǵýyna jol ashylady», delingen mınıstrdiń quttyqtaýynda.