Elordada delfınarıı ashyldy
NUR-SULTAN. QazAqparat – «Mega Silk Way» saýda jáne oıyn-saýyq ortalyǵyndaǵy Happylon Park-te delfınder shoýyn pash etetin delfınarıı ashyldy, dep habarlaıdy QazAqparat tilshisi.
Búgin Ortalyq Azııadaǵy eń iri sanalatyn elordadaǵy delfınarııde qaıyrymdylyq shoýy ótkizildi. Alǵashqy shoý Nur-Sultan qalasy ákimdiginiń muryndyq bolýymen balalar úıiniń tárbıelenýshileri úshin tegin uıymdastyrylǵan. «Karıb teńiziniń qaraqshylary» fılmi jelisimen túsirilgen shoýda akterlar men delfınder balalarǵa qýanysh syılap, jas dostardyń qoshemetine ıe boldy. Ortaǵa shyqqan Djek qaraqshy delfındermen túrli elementtegi ónerdi pash etti.
Happylon Park-tegi delfınarııdiń basqarýshysy Lázzat Tursynbaevanyń aıtýyna qaraǵanda, delfınarııge 400 oryndyq zal enedi. Delfınarııde turaqty akter retinde eki delfın Dı-Dı men Zevs, sondaı-aq Rokkı teńiz mysyǵy óner kórsetedi.
«Biz búgin 400 bala úshin qaıyrymdylyq shoýyn uıymdastyryp jatyrmyz. Negizi bul joba EKSPO aıasynda jasalǵan. Bul delfınarııdi birinshi ret Reseıden akterlar 4 delfın, 2 teńiz mysyǵyn ákelip, bir jyldyq kelisimshart boıynsha kontsertin berip ketken bolatyn. Sol kezde de eń aldymen qaıyrymdylyq shoý ótkizgenbiz. Búgin sol dástúrden attamaı, balalardy qýantýdy jón kórdik. Ár balanyń armany – delfındi bir kórý. Kópbalaly analardyń balalaryn, ákesi nemese sheshesi joq, odan bólek balalar úıinen balalar osynda keldi», - dedi Lázzat Tursynbaeva.
Onyń aıtýynsha, dúnıede delfınderdi belgili bir oıynǵa úıretý múmkin emes. Al elordaǵa ákelingen delfınder – bir kezderi úıretilgen delfınderdiń tóli.
«Bul akter delfınderimiz balalardyń qoshemetine qýana-qýana óner kórsetedi. Bylaıǵy kúnde delfınarııge kirý aqyly bolady. Baǵasy 3-5 myń aralyǵy», - deıdi ol.
Parkte delfınder úshin barlyq jaǵdaı jasalǵan. Olarmen turaqty túrde jattyqtyrýshylar jumys júrgizedi. Basseın de árdaıym tazartylyp turady. Sonymen birge, sý taǵylaryn 20 jyldyq ótili bar veterınar turaqty túrde tekserip turatyn kórinedi.
