Elordada dáýlesker kúıshi, kompozıtor Nurǵısa Tilendıevtiń 85 jyldyq mereıtoıyna arnalǵan ádebı-mýzykalyq kesh ótti

Óskeleń urpaqty Nurǵısa Tilendıevtiń shyǵarmashylyǵymen tanystyrý, jastar arasynda halyq mýzykasyn nasıhattaý, tyńdarmandardy ulttyń rýhyn qurmetteýge, kúı ónerin dáripteýge úndeý maqsatynda uıymdastyrylǵan sharaǵa Astana qalasynyń gýmanıtarlyq kolledji stýdentteri, ortalyqtyń qyzmetkerleri, qala turǵyndary qatysty.

Ádebı-mýzykalyq kesh barysynda ekran arqyly Nurǵısa Tilendıevtiń ómirbaıany týraly qysqasha beıne rolıkter, slaıdtar kórsetildi. Ánshi Perızat Turarova kompozıtordyń «Saǵyndym ǵoı», «Qustar» ánderin, Sáttibek Baıahov «Álqıssa» jáne «Aqqý» kúıin, sonymen qatar 2008 jyly Ispanııada ótken orys konkýrsynyń, reseılik, qazaqstandyq konkýrstardyń laýreaty Anel Nısanova «Sarjaılaý» ánin oryndady. Sonymen qatar kompozıtordyń ómirinen syr shertetin sýretter, ómirbaıanyna qatysty estelikter, shyǵarmalar jınaǵy arqyly arnaıy kórme de uıymdastyryldy.

Qazaq mýzykalyq mádenıetine, saz óneriniń órkendeýine ólsheýsiz úles qosqan, artyna óshpes mol mura qaldyrǵan, dáýlesker kúıshi, qazaqtyń áıgili kompozıtory Nurǵısa Tilendıevtiń «Dostyq jolymen», «Meniń Qazaqstanym» sııaqty kantatasy, Q.Qojamııarovpen birlesip jazǵan «Altyn taýlar» operasy, «Ata tolǵaýy» kúıi men orkestrge arnap jazǵan ózge de týyndylary halqynyń súıip tyńdaıtyn dúnıelerine aınaldy. Sondaı-aq onyń «Aqqý», «Ańsaý», «Arman», «Álqıssa», «Qorqyt ata týraly ańyz», «Kósh kerýeni», «Mahambet», «Farabı sazy» sııaqty kúıleri, «Sarjaılaý», «Alataý», «Aqjaıyq», «Aqqusym», «Óz elim» sııaqty ánderi halqynyń zor yqylasyna bólendi. Uly sazgerdiń budan basqa 40-tan astam pesasy, 20-dan astam fılmge jazǵan shyǵarmalary bar.