Elordada dástúrli qalalyq dombyrashylar festıval-baıqaýy ótedi

ASTANA. KAZINFORM — Astana qalasynda 28-29 qarashasy kúnderi qazaqtyń kúı ónerin dáripteýge arnalǵan dástúrli III qalalyq «Astana — kúı qanatynda» atty dombyrashylar festıval-baıqaýy ótedi. Bul týraly elorda ákimdiginiń baspasóz qyzmeti habarlady. 

Festıval aty ańyzǵa aınalǵan kúıshi, uly Qurmanǵazynyń shákirti, «ǵasyr adamy» atanǵan Dına Nurpeıisovanyń esimimen atalady. Aıtýly is-shara «Kúı anasy» respýblıkalyq qorynyń uıymdastyrýymen jáne Astana qalasy ákimdiginiń qoldaýymen ótkiziledi.

Baıqaýdyń basty maqsaty — Dına Nurpeıisovanyń shyǵarmashylyq murasyn ulyqtaý, ulttyq kúı ónerin keńinen nasıhattaý jáne daryndy jas dombyrashylardy qoldaý.

Baıqaý baǵdarlamasy: I týr 28 qarashada onlaın formatta ótedi; II týr 29 qarashada oflaın formatta, Astana qalasynda ótedi.

Baıqaýǵa 14-35 jas aralyǵyndaǵy oryndaýshylar qatysa alady.

Qatysýshylar eki jas sanaty boıynsha synǵa túsedi: I top — 14-18 jas; II top — 19-35 jas.

Festıval barysynda jas oryndaýshylardyń óner kórsetýimen qatar, qazylar alqasynyń kásibı baǵalaýy men shyǵarmashylyq sheberlik sabaqtary uıymdastyrylǵan. Baıqaý qorytyndysy boıynsha jeńimpazdar men laýreattar arnaıy dıplomdarmen jáne aqshalaı syılyqtarmen marapattalyp, is-shara sońynda úzdik qatysýshylardyń qatysýymen saltanatty gala-kontsert ótedi.

Bul kontsert — kúı óneriniń qudiretin sezinýge, ulttyq mádenıetke degen qurmetti arttyrýǵa arnalǵan erekshe rýhanı kesh bolmaq.

Aıta keteıik, «Kúı anasy» respýblıkalyq qory men Astana qalasy ákimdigi buǵan deıin elordada Dına Nurpeıisova esimin ulyqtaýǵa baǵyttalǵan kóptegen mádenı jobany júzege asyrǵan. Olardyń qatarynda eskertkish ornatý, «Kúıshiler alleıasyn» abattandyrý, dombyra ınstallıatsııasyn ornatý, áleýmettik jobalar men kitap basylymdaryn shyǵarý syndy bastamalar bar.

Bul jıyn elordanyń mádenı ómirindegi mańyzdy oqıǵalardyń biri ári qazaq kúı ónerin jańǵyrtý jolyndaǵy jarqyn mereke bolmaq. 

Aıta ketelik qazaq jazýshysy Qytaıdyń memlekettik syılyǵyn aldy.