Elordada dabyl batyrmasynyń qalaı jumys isteıtini tekserildi

NUR-SULTAN. QazAqparat – Elordada tótenshe jaǵdaıǵa tap bolǵanda polıtsııany shaqyrýǵa arnalǵan SOS dabyl batyrmasynyń qalaı jumys isteıtindigi is júzinde tekserildi, dep habarlaıdy QazAqparat tilshisi.

«SOS dabyl batyrmasy tótenshe jaǵdaıǵa tap bolǵanda qoldanýǵa arnalǵan. Sonymen qatar batyrmany tek qaýip tóngende ǵana emes jón suraý úshin de qoldanýǵa bolady. Mysaly, siz qalany jóndi bilmeımiz, adasyp kettińiz delik, sondaı jaǵdaıda SOS dabyl batyrmasyn basyp kómek suraýǵa bolady. Turǵyndardyń saýaly jedel áreket etý ortalyǵyna baryp túsip, odan ári polıtsııa qyzmetkerleri iske kirisedi», - Nur-Sultan qalasy Polıtsııa departamenti Jergilikti polıtsııa qyzmeti basqarmasynyń basshysy Arman Aıtmaǵambetov.

Búginde elorda aýmaǵynda 13 SOS dabyl batyrmasy ornalasqan. Aldaǵy ýaqytta onyń sany kóbeıtiledi.

Polıtsııa departamenti basshynyń birinshi orynbasary Baqytjan Malybaev atalǵan jańa qyzmet túrine qansha adamnyń júgingenin aıtty.

«Batyrmany tek tótenshe jaǵdaı bolǵanda ǵana emes, kúdikti is-áreket kezinde basyp, júginýge bolady. Búginde SOS dabyl batyrmasy arqyly 200-250 qońyraý kelip tústi. Olar jalǵan qońyraý emes. Rasymen adamdar jańa qyzmettiń qalaı jumys isteıtinin tekserip jatyr. Turǵyndarda polıtsııa rasymen shuǵyl jaýap bere me eken degen qyzyǵýshylyq bar. Keıde dabyl batyrmasyn basqan adamdar «shynymen isteıtindigin baıqaǵymyz kelgen» dep aıtyp jatady» , - deıdi ol.

Osy oraıda jurtshylyqtyń kózinshe SOSdabyl batyrmasynyń qalaı jumys isteıtini tanystyrylyp, kórsetildi.

Aıta ketsek, Nur-Sultan qalasynda zamanaýı servıstik polıtsııa qyzmetiniń jumysy tanystyryldy.

Sondaı-aq, elordada ýchaskelik polıtseılerdiń sany artqany aıtyldy.