Elordada cporttyq jastar festıvali bastaldy
NUR-SULTAN. QazAqparat - 4 qyrkúıek kúni elorda ákimdigi aldyndaǵy alańda «Qazaqstan Jastar Fest - 2019» cporttyq jastar festıvali bastaldy, dep habarlaıdy QazAqparat.
Festıvaldiń ashylýyna QR Mádenıet jáne sport mınıstri Aqtoty Raıymqulova, Nur-Sultan qalasynyń ákimi Altaı Kólginov, QR Mádenıet jáne sport mınıstrligi Sport jáne dene shynyqtyrý isteri komıtetiniń tóraǵasy Serik Sápıev jáne elimizge belgili sportshylar qatysty.
A.Raıymqulova atalǵan festıvaldiń mańyzdylyǵyn atap ótti.
«Ózderińiz biletindeı, Elbasy N.Á.Nazarbaev bıylǵy jyldy Jastar jyly dep jarııalaǵan bolatyn. Osy oraıda QR Mádenıet jáne sport mınıstrligi óskeleń urpaqty salaýatty ómir saltyna tartý, elimizde buqaralyq sportty damytý maqsatynda osyndaı sharany qolǵa alǵan bolatyn. Qala ákimdigi bizdiń ıdeıany qoldap áketti. Sol úshin de Nur-Sultan qalasynyń ákimi Altaı Kólginov myrzaǵa zor alǵysymdy bildiremin. Qazaqstan Respýblıkasynyń Prezıdenti Qasym-Jomart Kemelulynyń bıylǵy Joldaýynda aıtylǵan tapsyrmalarǵa sáıkes, biz buqaralyq sportty qarqyndy damytý jolynda biraz jobalardy qolǵa alyp jatyrmyz. Búgingi shara sonyń bastamasy», - dedi mınıstr.
Sóz sońynda vedomstvo basshysy osyndaı festıvaldi ótkizý kezegin Almaty qalasyna joldady.
Mınıstrliktiń Sport jáne dene shynyqtyrý isteri komıtetinen málim etkendeı, festıval aıasynda jas karateshiler, grepplıng sheberleri, strıtbolshylar, fýtbolshylar óz ónerlerin jınalǵan jurtshylyqqa pash etti. Sonymen qatar, ulttyq sport túrleri boıynsha bes asyq, asyq atý, arqan tartý, gir kóterýden jarystar uıymdastyryldy.
Sporttyq festıval elimizdiń barlyq óńirlerinde jalǵasady.
Sharany uıymdastyrǵan - QR Mádenıet jáne sport mınıstrligi jáne Nur-Sultan qalasynyń ákimdigi.
