Elordada COVID-19 dıagnostıkasy boıynsha mobıldi skrınıng iske qosyldy
NUR-SULTAN. QazAqparat - Endi avtoáýesqoılar men jolaýshylar koronavırýstyq ınfektsııaǵa jyljymaly kólikte otyryp-aq test tapsyra alady, dep habarlaıdy QazAqparat tilshisi.
«№2 kópbeıindi qalalyq aýrýhana» MKK bazasynda qysqa merzimde skrınıng júrgizýge múmkindik beretin qaýipsiz júıe jumys isteı bastaıdy.
Mobıldi ortalyqtyń qýaty kúnine 100-den astam testi quraıdy. Bir adamǵa protsestiń uzaqtyǵyna 3-5 mınýt ketýi múmkin, bul dástúrli skrınıngke jumsalatyn protsesiniń úshten bir bóligi.
«Bul koronavırýstyń aldyn alý úshin jasalǵan joba. Pılottyq rejımde jumys istep kórdik. Bir apta ishinde 700-ge jýyq kólik júrgizýshisi test tapsyrdy. Baǵasy - 10 myń teńge. Osy jerde tapsyrǵan test nátıjesi 6-7 saǵatta belgili bolady.
Naýqas ony bir táýlik ishinde elektrondyq poshta arqyly PDF formatynda alady. COVID-19 vırýsyna kúdikti bolǵan jaǵdaıda osy kezeńde testilenýshi mamandandyrylǵan aýrýhanaǵa aýystyrylady. Mobıldi skrınıng-ortalyq saǵat 08.00-den 20.00-ge deıin demalyssyz, indettiń sońyna deıin jumys isteıtin bolady», - deıdi qala ákiminiń orynbasary Baqtııar Máken.
Mobıldi ortalyqtyń jumys kezeńderi kelesi keste boıynsha qurylady: kirý — tirkeý — zerttep-tekserý — úlgi alý— shyǵý. Kirgennen keıin testilenýshiler jeke aqparat, epıdemıologııalyq faktorlarmen baılanysty sımptomdary bar saýalnamany toltyrady. Kabınada dene temperatýrasy kontaktisiz termometr kómegimen ólshenedi.
Tekserý ádisi vırýstyń taralýyn boldyrmaý jónindegi sharalardyń ádettegi modeline aınaldy.
«Mobıldi ortalyq turǵyndar kóp júretin jerge ornalastyryldy. Qajettilik bolsa qalanyń basqa jerlerinde de ashylýy múmkin. Bul jerde boıynda aýrý belgileri joq adamdar tekserile alady. Test aqysyn qolma-qol aqsha retinde berýge de, bank kartasy arqyly aýdarýǵa da bolady», - deıdi №2 qalalyq kópbeıindi aýrýhananyń dırektory Ivan Lı.
Nur-Sultanda osyndaı pýnkttiń ashylýy qala turǵyndary arasynda jasyryn aýrý oshaqtaryn anyqtaýǵa jáne asqynýlarǵa jol bermeı, ýaqtyly sanıtarlyq-epıdemıologııalyq jáne emdeý-aldyn alý sharalaryn qabyldaýǵa múmkindik beredi.
