Elordada BUU Órkenıetter alıansy dinı nysandardy qorǵaý máselesin talqylap jatyr
ASTANA. KAZINFORM – BUU Astanada Álemdik jáne dástúrli dinder kóshbasshylarynyń VIII sezin ótkizýdi resmı túrde qoldady. Osy oraıda BUU Órkenıetter alıansy aıasynda dinı nysandardy qorǵaý jóninde arnaıy sessııa ótkizdi.
- Qazir barsha álemde túrli daǵdarystar men terrorıstik áreketterdi kórip júrmiz, sonyń saldarynan adam ólimine, túrli dinı nysandardyń qıraýyna ákelip soǵan oqıǵalar anyqtalyp jatyr. Mundaı shabýyldardy lańkestik toptar uıymdastyrady jáne olardyń basty maqsaty – qoǵamymyzdy kúıretý, belgili bir keri áserge qol jetkizý, onyń ishinde halyqqa qorqynysh pen qaıǵy ákelý. Dinı nysandardy qorǵaý jáne qaýipsizdikti qamtamasyz etý - adamzat úshin mańyzdy qadamdardyń biri. Adam quqyqtary aıasynda osy nysandardyń qorǵalýyn qamtamasyz etýimiz kerek, - dedi BUU Bas hatshysynyń orynbasary – BUU Órkenıetter Alıansynyń Joǵary ókili Mıgel Anhel Moratınos.
Osy oraıda ol BUU Jarǵysy aıasynda múshe memleketter óz aýmaqtarynda qaýipsizdikti qamtamasyz etý jáne azamattardy qorǵaý boıynsha erekshe jaýapkershilikke ıe bolýy kerek ekenin atap ótti. BUU qararynda dinı nysandardy qorǵaý úshin tıisti úndeý jasalǵan.
- Osy nysandardy qorǵaý ulttyq qaýipsizdik saıasaty men strategııalary aıasynda júzege asyrýy kerek. Meshitterge jasalǵan lańkestik áreketterden keıin, bizdiń keńsede BUU-nyń is-qımyl jospary ázirlendi.
12 qyrkúıekte osy qujat qabyldanǵannan soń, mundaı ǵımarattardyń qaýipsizdigine jaýapty adam taǵaıyndalyp, qaýipsizdik máselesine qaraýy kerek. Bul talap BUU Qaýipsizdik Keńesinde aıtylǵan, óıtkeni bul qujat barlyq múshe memleketterge qatysty, - dedi BUU ókili.
Aıta keteıik, 2005 jyly BUU Bas hatshysynyń bastamasymen qurylǵan BUU Órkenıetter alıansy dinder, mádenıetter men halyqtar arasyndaǵy ózara túsinistikti nyǵaıtýda mańyzdy ról atqaryp keledi. Astanada Sezd alańdarynda sessııa ótkizý Qazaqstannyń halyqaralyq ınstıtýttarmen ózara is-qımylynyń mańyzdylyǵyn, sondaı-aq Sezdiń moıyndalǵan jahandyq rýhanı dıplomatııa alańy retindegi mártebesin naqtylady.
Budan buryn habarlanǵandaı, QR Senatynyń tóraǵasy Máýlen Áshimbaev halyqaralyq qaýipsizdik boıynsha barlyq áreket BUU jarǵysyna sáıkes bolýy tıis ekenin aıtty.