Elordada «Burqasyn-2022» festıvaline 2 myńnan asa adam qatysty
NUR-SULTAN. QazAqparat - Nur-Sultanda Esil ózeninde dástúrli «Burqasyn-2022» qysqy festıvali ótip, oǵan eki myńnan astam adam jınaldy, dep habarlaıdy elorda ákimdiginiń resmı saıty.
«Burqasyn-2022» is-sharasyn elorda ákimdigi uıymdastyrdy.
Festıval barysynda qatysýshylar 10 sport túri boıynsha synǵa túsedi: shańǵy jarysy, gir kóterý, armrestlıng, belbeý kúresi, arqan tartý, pımaly hokkeı, qar atý, avtosport, motosport jáne qysqy fýtbol. Dástúrli túrde shańǵy jarysynan qatysýshylar sany basym.
«Burqasyn-2022» festıvali 22 márte ótkizilip otyr. Bıyl festıval baǵdarlamasyna taǵy 2 sport túri qosyldy: belbeý kúresi jáne qol kúresi. Baǵdarlamaǵa engizilgen sport túrleri qala turǵyndarynyń usynysy negizinde irikteldi. Eki myńnan astam qatysýshy tirkelgen, olardyń ishinde áskerı bólimsheler de bar. Qatysýshylardyń jasy ártúrli. Mysaly, shańǵy jarysyna 4 jastaǵy balalar, gir sportyna 16-18 jas aralyǵyndaǵy balalar qatysa alady. Munyń bári ár sport túriniń talaptary men erekshelikterine baılanysty. Ár jas sanaty úshin medaldar men baǵaly syılyqtar qarastyrylǵan. Osy festıval arqyly biz qazir Beıjińde júrgen Olımpıada sportshylaryna qoldaý bildirgimiz keledi. Olar bizdiń qoldaýymyzdy sezingeni jón», – dedi elordalyq sport basqarmasy basshysynyń m.a. Samat Jylqybaev.
«Balalardyń osy is-sharaǵa qatysyp jatqany qatty qýantady. Sebebi buqaralyq sportty damytý jáne salaýatty ómir saltyna baýlý balalyq shaqtan bastalady. Sol sııaqty ata-analardyń da balalaryn sportqa baýlyp jatqany qýantady. Festıvaldiń ashylýymen quttyqtaımyn!» – dep atap ótti festıvaldiń qurmetti qonaǵy Olımpıada chempıony Serik Sápıev.
Damır Maıqynov №58 gımnazııada dene shynyqtyrý pániniń muǵalimi bolyp jumys isteıdi. Bıyl onyń 13 oqýshysy «Burqasyn-2022» festıvaliniń shańǵy jarysyna qatysyp otyr.
«Burqasyn-2022» qysqy festıvaline №58 gımnazııanyń atynan 2004, 2005, 2008 jáne 2009 jyldary týǵan 13 oqýshymyzdy ákeldik. Oqýshylar ǵana emes, muǵalimder de qatysýǵa nıet bildirdi. Balalardyń sportqa, onyń ishinde shańǵy sportyna degen súıispenshiligin arttyrý jáne tárbıeleý maqsatynda osyndaı is-sharalarǵa qatysý qajet dep sanaımyn. Oqýshylarymyz jyl saıyn osy festıvalge qatysady. Biz óz mektebimizde daıyndalyp jatyrmyz, qural-jabdyqtarymyz da jetkilikti. Oqýshylarymyz 500 metr, 1 km jáne 2 km qashyqtyqta óner kórsetedi», – dedi muǵalim.
Esterińizge sala keteıik, festıval Nur-Sultan qalasynyń turǵyndary men jastary arasynda buqaralyq sportty damytý, salaýatty ómir saltyn nasıhattaý maqsatynda ótkiziledi.
