Elordada búldirshinder arasynda eńbekteýden jarys ɵtti
NUR-SULTAN. QazAqparat - Bas qalada alǵash ret búldirshinder arasynda jarys ɵtti. Básekeniń ereksheligi sol, oǵan 6 aıdan 1,5 jasqa deıingi balalar qatysty, dep habarlaıdy Elorda Info.
«Kishkentaı búldirshinder arasyndaǵy eńbekteýden jarys astanada ǵana emes, elimizde alǵash ret uıymdastyrylyp otyr. Búgingi baıqaýǵa 375 ata-ana ɵtinish bildirgen. Arasynda aýa raıyna baılanysty kelmeı qalǵandary da bar. Bul konkýrsqa ɵtinish berý eki apta buryn bastalǵan. Bastapqyda nıet bildirgen ata-analar sany az bolatyn. Qatysýshylar az bolǵandyqtan, azdap qobaljyǵan edik. Biraq sońǵy úsh kúnde olardyń qatary kúrt artty», – dedi uıymdastyrýshy «Korkem» kompanııasynyń astanalyq fılıalynyń jetekshisi Gúlnár Qunanbaeva.
Aıta ketsek, aıaǵy erte shyǵyp, júrip júrgen balalar bul jarysta eńbektep synǵa túsedi. Bas júlde syılyǵy – jarysqa qatysýshy balalarǵa bir jylǵa jeterlik «molfix» kompanııasynyń jɵrgegi. Biraq uıymdastyrýshylar jarys jolyna shyqqan nárestelerdiń eshqaısysyn syılyqsyz qaldyrmady.
«Bul – əzirge kenje balam. Qazir 7 aıda. Kúndelikti eńbektep, jattyǵyp júrmiz. Mundaı jarystyń bolatynyn dostarymnan estidim. Sodan birden baıqaýǵa jazylyp, qatysyp otyrmyz. Bul – balamnyń ɵmirindegi alǵashqy jarysy, alǵashqy jeńisi. Aldaǵy ýaqytta uıymdastyrylyp tursa, jıi qatysyp turamyz», – dedi eń birinshi bolyp jarysqa shyǵyp, jeńimpaz bolǵan Jasmın esimdi baldyrǵannyń anasy Aıjan Júsipova.
«Korkem» kompanııasynyń ɵkili Hadısha Əbdiǵalıqyzynyń aıtýynsha, jeńiske jetken búldirshinder ɵzara synǵa túsip, sonyń nətıjesinde eki chempıon anyqtalady. Jarys jolynyń qashyqtyǵy – 10 metr. Osy aralyqty eńbektep ɵtýi úshin ata-analary uıaly telefondaryn, túrli oıynshyqtaryn paıdalandy.
