Elordada buqaralyq sportty damytý úshin qandaı shara jasaldy
NUR-SULTAN. QazAqparat - Elordada buqaralyq sportty damytý úshin álemniń úzdik tájirıbeleri zerdelenip, arnaıy baǵdarlama ázirlendi. Baǵdarlama aıasynda qandaı bastamalar júzege asyp jatyr. Qala ákimdigi osy suraqqa jaýap berdi, dep habarlaıdy QazAqparat.
Baǵdarlama aıasynda sporttyń oıyn túrleri (fýtbol, strıtbol) boıynsha aýla lıgalary ótkizildi.
Fýtbol men velosport damyp keledi
Qalanyń barlyq aýlasyn qamtý jáne qolda bar alańdardy tıimdi paıdalaný úshin 4 aýdanda ornalasqan 16 alańda aýla lıgasy ótkizildi. Lıga úsh aıǵa sozyldy. Onyń barysynda aýdanishilik, aýdanaralyq, qalalyq týrlar ótkizildi. Oǵan 1 760 adam qatysty.
Sonymen qatar qalamyzda halyqtyń sportpen shuǵyldanýyna da barlyq jaǵdaı jasalǵan. Naqtyraq aıtsaq, qalada 318 ashyq fýtbol alańy, 23 strıt vorkaýt alańy, sol sııaqty 40 basketbolǵa arnalǵan arnaıy alań bar.
Sol sııaqty velosport ta damyp keledi. Oǵan sáıkes velojoldardyń sany da edáýir artty.
Qazirgi tańda 70 km velojol tóseldi. Josparda 123 km velojol tóseý bar. Jasyl belbeý janynda 23 km velojol paıdalanýǵa berildi.
Nur-Sultan qalasynyń saıabaqtarynda da sportpen shuǵyldanýshylar sany artyp keledi. Trıatlon saıabaǵy, Astanalyq, Jeruıyq, Botanıkalyq saıabaqtarda júgirý jáne velosıpedke arnalǵan arnaıy joldar bar. Osynyń bári buqaralyq sport túrlerin damytý úshin jasalyp jatyr.
Smart sport – qoljetimdi sport
Qazirgi tańda álemdegi pandemııaǵa baılanysty sport is-sharalarynyń toqtap turǵany belgili. Osy jaǵdaıdy eskere otyryp, elorda turǵyndarynyń sportqa degen qyzyǵýshylyǵyn arttyrý maqsatynda ár aı saıyn júgirý jáne velojúgirýden onlaın jarystar uıymdastyryldy. Qala turǵyndary ózderine qolaıly ýaqytta, kez-kelgen saıabaqta júgirip, qortyndysymen «Strava» qosymshasy arqyly bólise alady. Sondaı-aq, toǵyzqumalaq, shahmat jáne doıby jarystary arnaıy platforma arqyly onlaın jarystar uıymdastyryldy.
Budan bólek buqaralyq sportty damytý maqsatynda da qazirgi zamannyń talabyna sáıkes halyqqa sportty qoljetimdi etý úshin Smart sport jobasy ázirlenýde. Bir mobıldi qosymsha arqyly qaladaǵy barlyq sporttyq ınfraqurylymdy, sport túrleri boıynsha jattyǵýlar ótkiziletin zaldardy, sport mekemelerindegi jattyqtyrýshylar, sporttyq is-sharalar jáne basqa da aqparatty qamtý josparlanǵan. Jalpy qala turǵyndary erkin pikir almasa alatyn platforma bolmaq. Osy qosymsha arqyly sport mektepterine qabyldaý úrdisin ońtaılandyrý qarastyrylýda.
Qalada 30-dan asa aýla klýby bar. Qazirgi ýaqytta halyqtyń áleýmettik osal toptarynan shyqqan úsh myńnan astam bala munda tegin oqyp, jattyǵady.
Dene shynyqtyrýmen jáne sportpen aınalysatyn azamattardy qamtýdy arttyrý maqsatynda «Qoljetimdi sport» baǵdarlamasy ázirlendi.
Elordanyń sport zaldarynda qarasha aıynda «Qoljetimdi sport» jobasy óz jumysyn jalǵastyrýda. Sporttyń 6 túrinen (fıtnes/zýmba, skandınavııalyq júrý, karate, júgirý, toǵyzqumalaq, ústel tennısi) sabaqtar qala boıynsha 40-tan astam jerde ótkiziledi. Soltústik serýendeý ashyq aspan astyndaǵy saıabaqtarda ótedi. Kez kelgen adam sport túrin tańdap, aptasyna 3 ret jattyǵa alady. Jobaǵa joǵary sanatty jattyqtyrýshylar, sport sheberleri, bilikti nusqaýshylar tartylǵan. Jattyǵýlar klýbtardyń, sport ortalyqtarynyń jáne sport saraılarynyń, sonyń ishinde Qazaqstan jeńil atletıka arenasy, Táýelsizdik saraıy jáne «Alaý» muz saraıynyń aýlalarynda ótedi.
Qatysýshylardy jalpy qamtý 20 myńnan astam elorda turǵynyń qurady. 2022 jyly jobany jazǵy kezeńge qaıta uıymdastyrý josparlanýda.
