Elordada býhgalterlik qyzmet atyn jamylyp, alaıaqtyq jasaǵan kúdikti ustaldy

ASTANA. KAZINFORM – Astana polıtseıleri 49 jastaǵy azamatshany alaıaqtyq jasady degen kúdikpen qolǵa túsirdi.

Polisia.kz portalynyń málimetinshe, kúdikti jumys berýshimen býhgalterlik qyzmet kórsetýge kelisimshart jasasyp, eshqandaı mindetin oryndamaǵan. Bul derek Almaty aýdanynyń krımınaldyq polıtsııa qyzmetkerleriniń jedel-izdestirý is-sharalary barysynda áshkerelendi. 

Kúdikti qashyqtan býhgalter qyzmetin usynyp otyrǵan. Jeke kásipkermen iri kólemdegi aqsha qarajatyn aýdarý máselesi boıynsha kelisim jasaǵan soń, ol aqshanyń bir bóligin ózine ıemdenip ketken. Materıaldyq shyǵyn 12 mıllıon teńgeni qurady.

Atalǵan fakti boıynsha qylmystyq is tirkeldi. Tergeý júrgizilip jatyr.

Polıtsııa beıtanys adamdarmen kelisimshart jasasqanda asa qyraǵylyq tanytýǵa shaqyrady. Eshqandaı jaǵdaıda óz qarajatyńyzdy aýdarmańyz. Alaıaqtardyń arbaýyna túsip, olardyń qurbany bolýyńyz múmkin ekenin este saqtańyz.

Eske sala keteıik, buǵan deıin 25 mlrd teńgeden astam aınalymy bar 50 narkoshoptyń qyzmeti áshkerelengenin jazǵan edik.