Elordada búgin «Astana-Open 2016» shahmat festıvali ótedi
ASTANA. QazAqparat - Qazaqstannyń túkpir-túkpirinen jáne taıaý shet memleketterden kelgen 250-ge jýyq shahmatshy jyl saıynǵy «Astana-Open 2016» shahmat festıvaline qatysady. Sharany Astana qalasynyń ákimdiginiń jáne Qazaqstan shahmat federatsııasynyń qoldaýymen Shahmat federatsııasy jáne «Gambıt» shahmat mektebi uıymdastyrady.
Jarystyń basty maqsaty - balalar men jasóspirimder quramasyn álem birinshilikterine daıyndaý. Oǵan halyqaralyq grossmeısterler, jasóspirimder arasyndaǵy Álem jáne Azııa birinshilikteriniń, chempıondary men júldegerleri, sheberler qatysady, dep habarlaıdy qalalyq ákimdiktiń baspasóz qyzmeti.
Festıval baǵdarlamasyna balalar men eresekter arasyndaǵy túrli formattaǵy bes týrnır engizildi: halyqaralyq grossmeısterler men sheberlerdiń qatysýymen ótetin blıts-týrnır, open-týrnır, sport sheberine kandıdat normasy bar týrnır, 8-den 12 jasqa deıingi balalar arasyndaǵy «Jas juldyzdar» týrnıri.
Festıval halyqaralyq shahmat kúni - 20 shildede saǵat 17.45-te M. Ótemisov atyndaǵy Oqýshylar saraıynda ótedi.
