Elordada Brazılııanyń «Ole Brazıl Klab» fýtbol akademııasyna oqýǵa baratyn 8 jasóspirim irikteldi

Іrikteý týryna elimizdiń túpkir-túpkirinen jınalǵan 100 bozbala qatysyp, baq synady. Aqpannyń 8-inde bastalǵan oıyndardyń sońǵy matchynda 22 oıynshy alańǵa shyǵyp, óz ónerlerin kórsetti.

Atalǵan elde bilim alyp jatqan 26 jas sportshynyń 8-in aýystyrý týraly sheshimdi akademııanyń tehnıkalyq komıssııasy shyǵarǵanyn atap ótken QR Sport jáne týrızm mınıstrligi Sporttyq rezerv basqarmasynyń bastyǵy Jumajan Imaıaqovtyń sózine qaraǵanda, oıyn nátıjesine sáıkes 10 jas sportshy iriktep alynyp, onyń 8-i shet elge attansa, al 2-ýi rezervte turmaq. «Sonymen qatar biz Brazılııaǵa baratyn bapkerdi de aıyrbastaýǵa sheshim qabyldadyq. Óıtken, aldynda jibergen jattyqtyrýshy Brazılııa fýtbolynyń aıla-tásilderin jetik meńgerip, bilimin tolyqtyryp qaıtty dep oılaımyz. Endi ol Qazaqstandaǵy bylǵary doptyń jas sheberlerimen jumys isteýi kerek», dedi.

Sonymen aǵymdaǵy oqý jylyna baratyn jańa bapker bolyp elimizdiń Fýtbol federatsııasy usynǵan Áýelbek Derbisbaev bekitildi. Ol federatsııanyń tehnıkalyq ortalyǵynda qyzmet istep, Anglııada eńbek ótilinen ótken. Sońǵy jyldary jasóspirimder fýtbol mektebinde bapker bolyp qyzmet atqarǵan.

Kelesi kezekte Brazılııadan sportshylardy irikteý maqsatynda arnaıy kelgen akademııanyń úılestirýshisi, atalǵan eldegi bizdiń fýtbol komandamyzdy daıyndaý boıynsha jetekshi Hılton Lýıs Alvıs Tostos sóz alyp, ótken jyly bilim alǵan qazaqstandyq sportshylardyń múmkindikterin jaqsylap zerdelegendikterin jáne olardyń deńgeıi qandaı ekendikterin jaqsy biletindikterin atap ótti.

«Aǵymdaǵy jyly qurama sapyn kúsheıtýdi maqsat ettik. Soǵan oraı komandanyń álsiz pozıtsııasyn kúsheıtý úshin irikteý ótkizdik», degen sheteldik mamannyń aıtýyna qaraǵanda, elimizdegi aıaq dop sheberleriniń deńgeıinen Brazılııada bilim alǵan fýtbolshylardyń deńgeıleri birshama artyq. Máselen, sheteldik mamandardyń jiti qadaǵalaýymen fýtboldyń qyr-syryn meńgergen jas fýtbolshylarymyz birqatar jarystarǵa qatysyp, atalǵan eldiń óńirlik jarystarynyń birinde jeńiske jetken.

Osylardy aıtqan brazılııalyq maman akademııaǵa bilim alýǵa baratyn fýtbolshylardyń esimderin jarııa etti. Sonymen Qýat Myrza, Aıbek Mirabzalov, Azamat Serikuly, Oljas Іlııasov, Eldar Ǵanıev, Ábdimálik Sársekbaev, Rafhat Aslan, Abylaıhan Dúısenov sáýir aıynda fýtboldyń qyr-syryn úırený úshin Brazılııa eline attanbaq.

QR Sport jáne týrızm mınıstrligi Sporttyq rezerv basqarmasynyń bastyǵy Jumajan Imaıaqov baspasóz máslıhatynyń sońynda kelesi jyly oqýlaryn aıaqtap, elge demalysqa kelgen aıaq dop sheberlerimen elimizdiń jastar quramasy alańǵa shyǵatyndyǵyn atap ótti.