Elordada bir kúnde 4 bala terezeden qulap, ekeýi mert boldy

ASTANA. KAZINFORM – Astana qalasynda bir kúnniń ishinde 4 bala terezeden qulady. Bul aqparatty qalalyq Densaýlyq saqtaý basqarmasynyń baspasóz qyzmeti rastady.

Qoǵamdyq densaýlyq saqtaý basqarmasynyń bizge bergen málimetinshe, eki bala jedel járdem jetkenshe qaza bolǵan. Qazir aman qalǵan eki bala aýrýhananyń reanımatsııa bóliminde em alyp jatyr, jaǵdaıy – aýyr.

Osy oraıda Astana qalasynyń polıtsııasy balalardyń qaýipsizdigine erekshe nazar aýdarýǵa shaqyrady.

- Jyl basynan beri 45 balalardyń terezeden qulaý oqıǵasy tirkeldi, onyń 12-si qaıǵyly aıaqtaldy. Mundaı oqıǵalar kóbine balalar qaraýsyz qalǵan kezde jáne úıdegi qarapaıym saqtyq sharalary saqtalmaý saldarynan bolyp jatady, - dep eskertedi qalalyq polıtsııa.

Eske salsaq, Tótenshe jaǵdaılar mınıstrligi balalardyń terezeden qulaý oqıǵalaryna alańdaýshylyq bildirdi.