Elordada bozbala boıjetkendi pyshaqtap óltirdi
ASTANA. QazAqparat - Elordalyq 17 jastaǵy boıjetkendi tanysy pyshaqtap óltirdi. Bul týraly Astana qalalyq Іshki ister departamentiniń baspasóz hatshysy Sofııa Qylyshbekova málim etti.
«Astana qalalyq ishki ister departamentiniń qyzmetkerleri elordanyń 17 jastaǵy turǵynyn óltirdi degen kúdikpen azamat M-ny tutqyndady. Qyz pyshaq jaraqatynan kóz jumdy. Aıta keterligi, kúdikti zardap shegýshiniń anasyna da pyshaq jaraqatyn salǵan», - dedi ol.
Aldyn ala málimetterge sáıkes, bozbala men boıjetken bir-birimen tanys bolǵan.
«Kúdikti tergeý abaqtysyna qamalyp, onyń ústinen QR QK-niń 96 baby boıynsha qylmystyq is qozǵaldy. Qazirgi ýaqytta barlyq qajetti saraptamalar taǵaıyndalyp, tergeý amaldary júrgizilýde», - dedi S.Qylyshbekova.
