Elordada boıjetkendi ǵalamtor arqyly tanysqan jigiti alǵashqy kezdesýinde tonap ketti

NUR-SULTAN. QazAqparat – Elordada boıjetkenmen ǵalamtordaǵy arnaıy saıtta tanysqan jigit ony birinshi kezdesýinde tonap ketti, dep habarlaıdy QazAqparat Nur-Sultan qalasy Polıtsııa departamentiniń baspasóz qyzmetine silteme jasap.

«Boıjetken jigitpen «Badoo» qosymshasynda tanysqan. Onlaın arqyly biraz aralasqan olar kezdespek bolǵan. Serýen kezinde jas jigit dóreki minez tanytyp, qyzdyń qolynan uıaly telefonyn julyp alyp, ketip qalǵan. Sol kúni qaskúnem mobıldik bankıngti paıdalanyp, sol arqyly dúkenderden taýar satyp alyp júrgen kezinde beınetaspalarǵa túsip qalǵan. Kelesi kúni urlaǵan «Samsung-12» telefonyn kóshedegi adamǵa satyp jibergen», - dep habarlady departamenttiń baspasóz qyzmeti.

28 jastaǵy er adam jedel-izdeý sharalary barysynda ustaldy. Oǵan qatysty «Tonaý» baby boıynsha qylmystyq is qozǵaldy.

Tergeý barysynda jas er adamnyń elorda aýmaǵynda osyǵan uqsas qylmys jasaǵany úshin izdestirilip jatqany anyqtaldy. Aǵymdaǵy jyldyń ishinde ol kem degende bir adamdy tonap, áıelden eki uıaly telefon urlap áketken. Qazirgi kezde ustalǵan er adamnyń buryn jasalǵan osyǵan uqsas qylmystarǵa qatysy anyqtalýda.

Nur-Sultan qalasynyń Polıtsııa departamenti azamattardy qyraǵy bolýǵa eskertedi. Qoǵamdyq oryndarda júrgende qymbat zattaryńyz ben iri aqshany ózgelerge kórsetpeýge tyrysyńyz.

«Eger sizge qatysty zańǵa qaıshy áreketter jasalsa, birden polıtsııa bólimine habarlaýyńyzdy suraımyz»,-delingen habarlamada.