Elordada boıjetken qyzǵa shabýyl jasaǵan 60 jastaǵy er adam ustaldy
NUR-SULTAN. QazAqparat - Elordalyq polıtsııa qyzmetkerleri keshki ýaqytta 18 jastaǵy qyzǵa shabýyl jasaǵan 60 jastaǵy er adamdy izin sýytpaı ustady, dep habarlaıdy QazAqparat qalalyq PD baspasóz qyzmetine silteme jasap.
Jábirlenýshiniń aıtýynsha oqıǵa saǵat 22.00-de bolǵan. Belgisiz er adam artynan júgirip kelip, jerge qulatpaqshy bolǵan jáne qolynan uıaly telefonyn tartyp alǵysy kelgen. Kómek surap aıqaılaǵan daýys ótip jatqan adamdardyń nazaryn aýdarǵan. Qylmysker qoryqqannan oqıǵa ornynan qashyp ketken.
Tonaý jasaýǵa oqtalǵany týraly habarlamany alǵannan keıin polıtsııa qyzmetkerleri oqıǵa ornyna tez arada bardy. Jedel izdestirý barysynda kúdikti ustaldy.
Japa shekken boıjetken polıtsııaǵa jetkizilgen kúdiktini tanydy. Tergeý júrgizý barysynda kúdiktiniń buryn eki áıel adamǵa shabýyl jasap, oqıǵa ornynan qashyp ketken tonaýshyǵa uqsaıtyny anyqtaldy.
Jábirlenýshilerdiń biriniń aıtýynsha, keshke jaqyn úıine kele jatqanda belgisiz adam basynan birneshe ret uryp, qolynan noýtbýgyn, jeke zattary salynǵan sómkesin, uıaly telefonyn tartyp alǵan. Sodan soń belgisiz baǵytqa qashyp ketken. Ekinshi jábirlenýshiniń aıtýynsha, úıine qaıtyp kele jatqanda qarsy kele jatqan er adam qasynan ótip ketip, kenetten artqa burylyp, uıaly telefonyn tartyp alǵan. Ustalǵan adam Ózbekstan Respýblıkasynyń azamaty bolyp shyqty. Jasaǵan is-áreketin moıyndady.
Áıelderdiń biriniń noýtbýgyn jáne jeke zattaryn jerge kómip, tyǵyp qoıǵan.
Ustalǵan adam Ýaqytsha ustaý ızolıatoryna qamaldy. Qylmystyq is qozǵaldy. Tergeý amaldary júrgizilýde.
