Elordada bos turaq oryndaryn izdeýge arnalǵan mobıldi qosymsha daıyndaldy
ASTANA. QazAqparat - Elordada bos turaq oryndaryn izdeýge arnalǵan mobıldi qosymsha daıyndaldy. Qyzmettiń ortasha quny 55 teńge, dep habarlaıdy Astana qalasy ákimdiginiń resmı saıty.
TuraQshare mobıldi qosymshasyn Astana turǵyndary ázirledi. Ol turǵyn úı keshenderindegi bos turaq oryndaryn jalǵa alýǵa kómektesedi.
«Astana Hub» IT-startap halyqaralyq ortalyǵynda mobıldi qosymshany ázirleýshiler «Bıznestin jol kartasy - 2020» baǵdarlamasy aıasynda memlekettik grantqa ıe boldy. «Mysaly, azamattar turǵyn úı keshenderindegi bos turǵan nemese ıesine ázirge qajeti joq kólik turaǵyn bizdiń mobıldi qosymsha arqyly ekinshi adamǵa jalǵa bere alady. Qazirgi kezde TuraQshare qosymshanyń Android nusqasyna biz 16 turǵyn úı keshenin engizdik, onda jalpy qosqanda 2 myńǵa jýyq turaq orny bar. Bizdiń oıymyzsha ár besinshi turaq ıesi ózine tıesili turaq ornyn jalǵa bergisi keledi, bere alady da», - dedi joba avtorlarynyń biri Ánýar Baıtýlaqov.
Qyzmettiń ortasha quny - 55 teńge.
«Bizde naqty tarıf belgilengen. Adam oryndy bir aptaǵa nemese bir aıǵa, birneshe saǵatqa alýy múmkin. Bir aıda 15 myń teńge, al 1 saǵatqa - 150 teńge tóleısiz. Al birinshi saǵattan keıingi ýaqytta tóleıtin tólemderińizdiń mólsheri azaıa beredi. Orta eseppen ár saǵat úshin 55 teńge tóleý kerek. Óz tarapymyzdan turaq ornyn, saqtyq sharalaryn qamtamasyz etemiz», - deıdi ol.
Qazirgi tańda qosymsha Android-ta beta-versııada testtik júıede jumys isteýde. Qosymsha iPhone qoldanýshylar úshin 1 qańtardan bastap qoljetimdi bolady.
