Elordada bos oryndar jármeńkesi ótkiziledi

ASTANA. QazAqparat - 17 shildede elordada saǵat 10.00-13.00 aralyǵynda Astana qalasynyń Jumyspen qamtý ortalyǵynda (E.Brýsılovskıı k-si, 17/3) bos oryndar jármeńkesi ótedi. Bul týraly astana.kz saıtyna Astana qalasy ákimi apparatynyń baspasóz qyzmetinen habarlady.

Jármeńkege kelýshiler bir ýaqytta birneshe jumys berýshimen áńgimelesedi, oqý oryndarynyń túlekteri «Jumyspen qamtý jol kartasy - 2020» baǵdarlamasy aıasynda jastar praktıkasyna qatysa alady, halyqtyń nysanaly toptaryna jatatyn tulǵalar áleýmettik jumys oryndaryna usynylady.

Qazirgi ýaqytta Astana qalasynyń Jumyspen qamtý ortalyǵynda tiginshi, aspazshy, tárbıeshi mamandyqtary boıynsha kýrstarǵa qabyldaý júrgizilip jatyr. Sonymen qatar, qyrkúıek aıynda mamandyǵy joq tulǵalar úshin baılanys montajdaýshysy-kabeldeýshi, tiginshi, kútý boıynsha kishi meıirbıke mamandyqtary boıynsha kásiptik daıarlaý júrgiziledi.