Elordada «Bopaı hanym» spektakli qoıylady
NUR-SULTAN. QazAqparat – 14-15 mamyr kúnderi Q.Qýanyshbaev atyndaǵy memlekettik akademııalyq qazaq mýzykalyq-drama teatry «Bopaı hanym» tarıhı tragedııasyn kórermen nazaryna usynady, dep habarlaıdy QazAqparat teatrdyń baspasóz qyzmetine silteme jasap.
Týyndy avtory – Abaı atyndaǵy memlekettik syılyqtyń laýreaty Roza Muqanova. Rejısseri – Juldyzbek Jumanbaı.
«Bopaı hanym – Ábilqaıyrdyń jary, qıyn kúnderde el tynyshtyǵy men birligi úshin pende basyndaǵy qaıǵyny da, aýyrtpalyq pen alaýyzdyqty jeńe bilgen kóregen qazaq áıeli. Bopaıdyń qaıratkerlik tulǵasy, asyl ana retinde tárbıelik ónegesi – ultqa maqtanysh, urpaqqa úlgi. Bopaı hanym beınesin birinshi quramda teatr jáne kıno maıtalmany, Qazaqstannyń eńbek sińirgen qaıratkeri, professor, «Qurmet», «Parasat» ordenderiniń ıegeri Leılo Beknazar-Hanınga somdaıdy», - delingen teatr habarlamasynda.
Sonymen birge, premera aldynda Leılo Aqnazarqyzynyń sahna jáne kınodaǵy 40 jyldyq shyǵarmashylyǵyna arnalǵan «Juldyzym meniń joǵary» kitabynyń tusaýy kesiledi.
Premeranyń ekinshi kúni Bopaı rólinde Qazaqstan Jastar Odaǵy «Serper» syılyǵynyń laýreaty Saıa Toqmanǵalıeva oınaıdy.
Al Ábilqaıyr han rólin birinshi quramda Erjan Nurymbet, ekinshi quramda – Qazaqstannyń eńbek sińirgen qaıratkeri Syrym Qashqabaev, Nuráli handy – Qazaqstan Jastar Odaǵy «Serper» syılyǵynyń laýreaty Janat Ospanov jáne Bázil Sultanǵazy, Baraq Sultan rólin – Qazaqstannyń eńbek sińirgen qaıratkerleri Qýandyq Qystyqbaı men Janqaldybek Tólenbaev somdaıdy.
