Elordada «Bolashaq oıyndary» aıasyndaǵy Dúnıejúzilik fıdjıtal sammıti bastaldy
ASTANA.KAZINFORM – Astanada «Bolashaq oıyndary» halyqaralyq mýltısport týrnıri aıasynda ótip jatqan Phygital Sports Summit Astana 2026 forýmy bastaldy, dep habarlaıdy QR Týrızm jáne sport mınıstrliginiń baspasóz qyzmeti.
Іs-sharanyń ashylýynda QR Týrızm jáne sport mınıstri Erbol Myrzabosynov sóz sóılep, fıdjıtal sporttyń jahandyq sport ındýstrııasyndaǵy orny men ony damytýdaǵy halyqaralyq yntymaqtastyqtyń mańyzyn atap ótti.
Sammıtke Birikken Arab Ámirlikteriniń sport mınıstri Ahmed Belhýl Ál Falası, Reseı Federatsııasynyń sport mınıstri Mıhaıl Degtıarev, Ózbekstan Respýblıkasynyń sport mınıstri Adham Ikramov, Ázerbaıjan Respýblıkasynyń jastar jáne sport mınıstri Farıd Gaıbov, Belarýs Respýblıkasynyń sport mınıstri Sergeı Kovalchýk, sondaı-aq halyqaralyq sport uıymdarynyń ókilderi, tehnologııalyq kompanııalar men túrli elderdiń sarapshylary qatysyp jatyr.
Sammıt baǵdarlamasy aıasynda fıdjıtal sportty damytý, halyqaralyq seriktestikti nyǵaıtý, tsıfrlyq tehnologııalar, ınnovatsııalar jáne sport ındýstrııasynyń bolashaǵyna arnalǵan paneldik sessııalar ótedi.
Uıymdastyrýshylardyń aıtýynsha, Phygital Sports Summit Astana 2026 tájirıbe almasýǵa, ózekti máselelerdi talqylaýǵa jáne fıdjıtal qozǵalysyn odan ári damytýǵa baǵyttalǵan jańa bastamalardy qalyptastyrýǵa múmkindik beretin mańyzdy halyqaralyq alańǵa aınalmaq.
Aıta keteıik, «Bolashaq oıyndary – 2026» halyqaralyq týrnıriniń ashylý saltanatyna birqatar memleket basshylary qatysady.
