Elordada bokstan VI jazǵy spartakıada aıaqtaldy: ulttyq qurama jańadan jasaqtalatyn boldy
Astanadaǵy «Beeline Arena» sport kesheninde uıymdastyrylǵan bokstan erler arasyndaǵy Qazaqstan Spartakıadasy óz máresine jetti, dep habarlaıdy Kazinform QR Týrızm jáne sport mınıstrliginiń baspasóz qyzmetine silteme jasap.
Bir aptaǵa jalǵasqan baıraqty básekede otandyq boksshylar 13 salmaq (46-48 kg, 51 kg, 54 kg, 57 kg, 60 kg, 63,5 kg, 67 kg, 71 kg, 75 kg, 80 kg, 86 kg, 92 kg, +92 kg) dárejesinde óner kórsetip, ózara myqtyny anyqtady.
Týrızm jáne sport mınıstri Ermek Marjyqpaev jarystyń fınaldyq jekpe-jekterin tamashalap, jeńimpaz boksshylar men júldegerlerdi marapattady.
«Bokstan elordada uıymdastyrylǵan respýblıkalyq spartakıada básekesi aıaqtaldy. Jarystyń sońǵy kúnindegi fınaldyq jekpe-jekter kópshilik kútkendeı óte tartysty ótti. Elorda sharshy alańynda elimizdiń eń úzdik boksshylary men ár jyldardaǵy 6 álem chempıony qolǵap túıistirip, jankúıerlerge óz sheberligin pash etti. Jarys barysynda tóreshiler ádil jumys istegenin, al el spartakıadasy óte joǵary deńgeıde uıymdastyrylǵanyn atap ótken jón. Apta boıy boksshylarǵa qoldaý bildirip, jarysty tamashalaǵan elorda turǵyndary men qonaqtaryna erekshe alǵysymdy bildirgim keledi. Olar súıikti boksshylaryna sońyna deıin bolysyp, sport keshenin naǵyz boks dýmanyna bóledi», dep atap ótti Týrızm jáne sport mınıstri Ermek Marjyqpaev.
Týrnır qorytyndysy boıynsha ár salmaq dárejesinde elimizdiń birinshi nómirli boksshylary anyqtalyp, ulttyq qurama jańadan jasaqtalady. Spartakıadada top jarǵan bylǵary qolǵap sheberleri kelesi jylǵa josparlanǵan halyqaralyq jarystar men Olımpıada oıyndaryna lıtsenzııa beretin týrnırlerge qatysady.
Qazirgi tańda bokstan Qazaqstan ulttyq quramasynda Parıj Olımpıadasynyń eki joldamasy bar. Asa aýyr salmaqtaǵy Qamshybek Qońqabaev pen qyzdar arasyndaǵy Karına Ibragımova jýyrda ǵana Qytaıda ótken Azııa oıyndarynda lıtsenzııaǵa ıe bolǵan edi.
