Elordada bokstan ótken Qazaqstan birinshiliginde negizinen jas túlekter jeńis tuǵyryna kóterildi
ASTANA. Qańtardyń 25-i. QazAqparat - Qańtardyń úshinshi aptasynda elordada bokstan Qazaqstan birinshiligi ótti. Osy jarysqa elimizdiń barlyq óńirinen 212 boksshy qatysty.
Bir apta ótken jarys qańtardyń 23-i kúni óz máresine jetti, dep habarlaıdy QazAqparat.
Astanadaǵy sáni men saltanaty kelisken «Dáýlet» sport kesheninde ótken bylǵary qolǵap sheberleriniń tartysty básekeleri jankúıerlerdiń kóńilinen shyqty.
Joǵary deńgeıde ótken jarysta negizinen jas túlekter jeńis tuǵyryna kóterildi.
El birinshiliginde astanalyqtar 19 jasar Іlııas Súleımenov (48 kg), 18 jasar Danııar Eleýsinov (64 kg), 21 jastaǵy Danııar Tólegenov (54 kg) jáne shyǵysqazaqstandyqtar 20 jasar Mıras Jaqypov(51 kg), 19 jasar Aıdar Ámirzaqov (60 kg), 25 jasar Manat Ómirzaqov (69 kg), tájirıbeli boksshy Danabek Sýjanov (75 kg) altyn medalǵa ıe bolyp, bıik tuǵyrǵa kóterildi.
Sonymen qatar ózge salmaqtarda qaraǵandylyq Almat Serimov (81 kg), úsh qostanaılyq boksshy Aslan Muqanov (57 kg), Jan Kosobýtskıı (91 kg), Ivan Dychko (91 kılodan joǵary) bokstan 2010 jylǵy Qazaqstan birinshiliginiń jeńimpazdary atandy.
