Elordada bochchadan halyqaralyq týrnır ótedi
ASTANA. KAZINFORM — Bıyl tamyzda «Astana 2025 World Boccia Challenger» halyqaralyq týrnıri ótedi. Búginde aıtýly jarysqa 14 el qatysatynyn rastady.
— 2025 jyly 20-28 tamyz aralyǵynda Astana 2025 World Boccia Challenger jarysy ótedi. Bul halyqaralyq bochcha federatsııasynyń resmı týrnıri. Osy jarys arqyly 2028 jyly Los-Andjeleste bolatyn paralımpıadaǵa upaı jeńip, irikteýden ótýge bolady. Bul týrnırdiń elordada ótýiniń mańyzy zor. Bul Qazaqstannyń halyqaralyq jarystardy ótkize alatynyn, onyń ishinde ınklıýzıvti sporttyń damyp jatqanynyń kórsetkishi, — dedi Qazaqstan bochcha federatsııasynyń vıtse-prezıdenti Nazym Janǵazınova ortalyq kommýnıkatsııalar qyzmeti alańynda ótken baspasóz máslıhatynda.
Halyqaralyq týrnırdi Qazaqstan bochcha federatsııasy uıymdastyrady.
— Búginde Azııa, Eýropa, Taıaý Shyǵystyń 14 eli qatysatyndaryn rastady. Tirkelý júrip jatyr, áli bir aı bar, basqa da memleketter rastaıdy dep kútip otyrmyz. Jarys qatysýshylary jeke, jup jáne komandamen básekege túsedi, — deıdi ol.
Eske salsaq, 2023 jyly elordada alǵash ret bochchadan Qazaqstan kýbogi ótti.
Aıta keteıik, Senat spıkeri Máýlen Áshimbaev bochchany damytý — ınklıýzııa mádenıetin qalyptastyrý jolyndaǵy ozyq úlgi ekenin aıtqan edi.