Elordada blokpostar 1 maýsymǵa qaraǵan túni alynady
NUR-SULTAN. QazAqpart – Nur-Sultanda blokpostar 1 maýsymǵa qaraǵan túni alynady. Bul týraly QazAqparat ákimdikke silteme jasap habarlaıdy.
«Táýlik boıy qala aýmaǵynda ornalasqan blok beketterde polıtsııa qyzmetkerleri, Qarýly Kúshterdiń áskerı qyzmetshileri, Ulttyq gvardııanyń ókilderi kezekshilik etti. Sonymen birge, blokpostarda áskerge shaqyrylǵandar da kezekshilik etti. Qalaǵa kirip-shyǵýǵa tyıym salý Covid-19 indetiniń taralýyn azaıtýǵa múmkindik berdi.
Blokpostarǵa kirý jáne shyǵý úderisi tolyǵymen avtomattandyrylǵan. Polıtsııa qyzmetkerleriniń planshetterine engizilgen elektrondyq baza tártipbuzýshylyqty anyqtaýǵa kómektesti. Mysaly, birqatar kásiporyndar qala boıynsha júrip-turý úshin anyqtamany qoldan jasaýǵa tyrysty. Azyq-túlik júkteri úshin «jasyl dáliz» uıymdastyryldy, ol arqyly qalanyń tynys-tirshiligin qamtamasyz etetin qyzmetkerler de óte aldy. Blokpostardaǵy jaǵdaıdy drondarmen baqylaý múmkin boldy», - dep jazdy Nur-Sultan qalasy ákimdiginiń baspasóz hatshysy Aqmaral Oljabaeva jelidegi paraqshasynda.
Onyń aıtýynsha, ótkizý-baqylaý beketterin alý - qalypty ómir súrý daǵdysyna oralamyz degendi bildirmeıdi.
«Qalada medıtsınalyq maska kıip júrý qajet. Turǵyndar sanıtarlyq normalardy qatań saqtaýy kerek. Maska kıip, ara qashyqtyqty saqtap, qoldy antıseptıkpen óńdegen jón», - dep tolyqtyrdy ol.
Eske salsaq, buǵan deıin Qazaqstan qalalary arasyndaǵy blokpostar alynatyndyǵy týraly habarlaǵan bolatynbyz.