Elordada «BKS Eır Astana marafony - 2015» qaıyrymdylyq sharasy ótedi
ASTANA. QazAqparat - Jeksenbi kúni, 13 qyrkúıekte elordada alǵash ret «BKS Eır Astana marafony - 2015» qaıyrylymdyq sharasy ótedi. Marafonnyń uzaqtyǵy 42 km 195 metrdi quraıdy. Jarys 4 qashyqtyqqa jáne 2 marshrýtpen ótkiziledi.
Búginde marafonǵa 560, onyń ishinde 18 memleketten 158 sportshy qatysady.
«BKS Eır Astana marafony» qaıyrymdylyq sharasyn ótkizýge arnalǵan baspasóz máslıhatynda Astana qalasy ІІD Ákimshilik polıtsııa basqarmasynyń basshysy Baqytjan Malybaev, marafon kezinde jol qozǵalysynyń kestesin uıymdastyrý jaıly egjeı-tegjeıli aıtyp ótti. 13 qyrkúıekte saǵat 8.00-den 14.30-ǵa deıin Turan dańǵylyndaǵy «Tulpar» kópirinen Qabanbaı batyr dańǵylyndaǵy aınalma jolǵa deıin, Qabanbaı batyr dańǵylynan «Qaraótkel» kópirine deıin, Qorǵaljyn tas jolynan Turan dańǵyly men «Astanalyq» saıabaǵyna deıin kólik qozǵalysy shekteledi. Bul jol 21 km 97,5 m quraıdy.
Marafon barysynda Turan dańǵylynyń boıymen Kenesary kóshesinen Saryarqa kóshesine deıin áýejaı jolynan Qabanbaı batyr dańǵylyndaǵy aınalma joldan «Qaraótkel» kópirine deıin jol qozǵalysy shekteledi.
Keptelisterdi boldyrmaý maqsatynda júrgizýshilerden aınalyp ótýdiń balama joldaryn qoldaný qajettiligi eskertildi.
Birinshi aınalyp ótý joly: Saryarqa kóshesinen Turan dańǵyly - Bógenbaı batyr dańǵyly jaqtan Tilendıev kóshesi boıymen Beısekov kóshesine - Syǵanaq kóshesinen Orynbor kóshesi nemese Seıfýllın kóshesi arqyly Beısekov kóshesine - Syǵanaq kóshesi - Orynbor kóshesi.
Ekinshi aınalyp ótý joly: sol jaǵalaýǵa ótý úshin Qabanbaı batyr dańǵylyndaǵy aınalyp ótýdi Táshenov kóshesine Orynbor kósheleri arqyly júzege asyrýǵa bolady.
Astanalyq halyqaralyq áýejaıǵa jol tartqan qala turǵyndary men qonaqtary, «Qosshy» kentinen kele jatqandar úshin aınalyp ótý joly: Qabanbaı batyr jáne Turan dańǵyly arqyly áýejaı tas jolymen Orynbor kóshesine odan ári M-1 kópiri arqyly Saraıshyq kóshesine nemese M-2 arqyly Tashenov kóshesine jáne M-2 kópiri arqyly Syǵanaq kóshesine ótý usynyldy, dep habarlaıdy astana.kz.
