Elordada bıznes ortalyqtary janyndaǵy turaqtardan shlagbaýmdy alyp tastaý qajet - Shyńǵys Dosybaev
NUR-SULTAN. QazAqparat – Elordanyń bıznes ortalyqtary janyndaǵy turaqtardan shlagbaýmdardy alyp tastaý qajet. Mundaı usynysty «Astana kólik turaǵy keńistigi» JShS-nyń dırektory Shyńǵys Dosybaev jasady, dep habarlaıdy QazAqparat tilshisi.
«Olar (bıznes ortalyqtary) kólik turaǵy aýmaǵyn shlagbaýmmen jaýyp alyp, arnaıy tizim ázirleıdi jáne ózderiniń basymdyqqa ıe qonaqtaryna ruqsatpen kirý tehnıkalyq sheshimin jasap alǵan. Al bul kóshelerdiń jol jelisinde kólik kollapsyn týyndatady. Bıznes ortalyqtyń basym bóligi jurt kóp jınalatyn jerde shoǵyrlanǵan jáne kelgen adamdar kire almaı jatady. Sonyń kesirinen «Nurjol» jelekjolyndaǵydaı kólik keptelesi oryn alady. Aıtalyq, «Emırald Taýer» ǵımaraty memleket jerine shlagbaým júıesin engizip, ár kólikten 150 teńge alyp otyr. Al biz qalanyń barlyq turǵynyna birdeı jaǵdaı jasaǵymyz keledi», - dedi ol astananyń kásipkerler palatasy otyrysynda.
Onyń atap ótýinshe, dál osyndaı jaǵdaı «Marden» bıznes ortalyǵynda oryn alǵan.
«Olar da shlagbaýmmen jaýyp alǵan. Soǵan baılanysty adamdar kólikterin Beıbitshilik pen Seıfýllın kóshelerinde ekinshi qatarǵa qoıyp ketýge májbúr. Biz bul shlagbaýmdardy alyp tastap, búkil qalada jumys istep turǵan zamanaýı aqyly turaqtardy ornatýdy usynamyz», - dedi Shyńǵys Dosybaev.
