Elordada bıznes ókilderiniń ǵylymı-tehnıkalyq konferentsııasy ótip jatyr
NUR-SULTAN. QazAqparat – International Academy of Refrigeration (IAR – Halyqaralyq sýyq akademııasy) elordada H mereıtoılyq ǵylymı-tehnıkalyq konferentsııasyn ótkizip jatyr, dep habarlaıdy QazAqparat tilshisi.
Konferentsııanyń negizgi taqyryby – Qazaqstan Respýblıkasyndaǵy ónerkásiptik tońazytý jáne kondıtsıonerlik aýa salasyndaǵy energııa jáne ekonomıkalyq tıimdilikti arttyrý, ekologııalyq turǵyda qaýipsiz tehnologııalardy damytý bolyp otyr. Shara barysynda bilim, ǵylym, bıznes jáne ártúrli óndiris salasynyń mamandary bas qosyp, mańyzdy máselelerdi talqylaýda.
«Bul konferentsııanyń tarıhy 2011 jyldan bastalady. 2010 jyly Qazaqstanda ІAR-dyń ókildigi ashyldy da, kelesi jyldyń naýryzynda Almatydaǵy «Medeýde» alǵashqy jıyndy ótkizgen edik. Jyl saıyn qatarymyzǵa qosylyp, sharanyń aýqymy keńeıip keledi. Bizdiń konferentsııa eń aldymen qazaqstandyq bıznes ókilderiniń ózara seriktese jumys júrgizýin, aqyldasyp, eńbek etýin kózdeıdi. Osylaısha osy talqylaýdyń arqasynda seriktesterdiń, taraptardyń kásibı ósimine qol jetkizemiz», - dedi Qazaqstandaǵy IAR ókildiginiń tóraǵasy Aleksandr Tsoı.
Konferentsııany IAR Ekologııa, geologııa jáne tabıǵı resýrstar mınıstrligimen, Qazaqstan tońazytqysh ónerkásibi qaýymdastyǵymen, Qazaqstan tamaq ónerkásibi odaǵymen, «QazExpoCongress» UK» AQ-pen birge ótkizýde.
