Elordada «Biz birgemiz!» uranymen beıbit mıtıng ótti
Ruqsat etilgen mıtıng negizinen eldiń birligine, qoǵamda oryn alyp jatqan máselelerge arnalǵan. Sonymen qatar, onda sóz sóılegender negizinen qoǵamnyń kóńilin syrttan kelip jatqan túrli ıdeıalarǵa senbeı, eldiń tutastyǵyna, memelket tarapynan qabyldanyp jatqan áleýmettik baǵdarlamalardy qoldaýǵa shaqyrdy. Máselen, QR Parlament Májilisiniń depýtaty Bekbolat Tileýhan el halqyn sheten jasalǵan arandatýshylyqqa ermeýge shaqyrdy.
«Táýelsizdik jyldarynda jetistikter az emes. Qaı el keıingi 20-30 jylda astana salypty, qaı el óziniń qandastaryn syrttan aldyrypty? Búginde birneshe elden baýyrlarymyz qonys aýdardy. Qarap otyrsaq, qanshama jetistikter bar. Osynyń barlyǵynan aıyrylyp qalý qandaı azap, qasiret ekenin bilesizder me? Bizdi tarıhy 2-3 ǵasyrǵa sozylǵan Eýropa elderimen salystyryp jatady. Ony qalaı salystyrasyz, keshe ǵana buǵaýdan shyqtyq. Endi esimizdi jıyp kele jatqanda bizge sabyr men shúkirshilik kerek», - dedi B. Tileýhan
Óz kezeginde belgili memleket jáne qoǵam qaıratkeri Orazkúl Asanǵazy otbasylyq qundylyq máselelerine toqtaldy.
«Árkim óz otbasyna ıe bolýy kerek. Er azamat - alǵan áıelińdi, perzentińdi jylatpa! Áıelderdi kóshege shyǵaryp qoıyp, jigitterdiń úıde otyrǵany jaraspaıdy. Otbasynyń jaýapkershiligi er azamatta. Munymen qosa, áıelder qaýymy er azamattarymyzdy baǵalaýdy upytpaıyq», - dedi O. Asanǵazy.
Sonymen qatar, Májilis depýtaty Baqytbek Smaǵul Prezıdent Qasym-Jomart Toqaev árbir qazaqstandyqtyń múddesi úshin jumys isteýge, ulttyq múddeni qorǵaýǵa ýáde etkenin aıta kele: «Barlyqtaryńyzdy problemalardy birge sheshýge, jaqsylyqqa senýdi, arsyzdar men arandatýshylyqqa ermeýdi, namysty qoldan bermeýdi, bıikke ǵana órleýdi maqsat tutsaq dep barsha qazaqstandyqtardy shaqyramyn. Qazaqstan bizdiń ortaq jerimiz! Al bizdiń jerimizde árqashan da beıbitshilik pen turaqtylyq qajet», - dedi.
Aıta keteıik, búgin Almaty men Nur-Sultan qalalarynda sanktsııalanǵan mıtıngter ótip jatyr.
