Elordada «Biz birgemiz» chellendji bastaldy

NUR-SULTAN. QazAqparat - Elorda jastary áleýmettik jelide qar tazalaý boıynsha chellendjdi bastady, dep habarlaıdy QazAqparat qala ákimdiginiń saıtyna silteme jasap.

Jastar turǵyndardy aýlasyndaǵy qardy tazalap, ony beınejazbaǵa jazyp, #Bizbirgemiz heshtegimen áleýmettik jelige salýǵa shaqyrady. Volonterler atalmysh chellendjdi bastaý ıdeıasyn qalyń qardyń túsýi men kommýnaldyq qyzmet jumysshylaryna qoldaý kórsetýmen baılanystyrady.

Búgingi kúnniń ózinde elorda eriktilerin belgili ázil-syqaqshy, telejúrgizýshisi Tursynbek Qabatov, jýrnalıst, telejúrgizýshi Ashat Sadyrbaı, «Nazar aýdar» teatrynyń ártisteri qoldady.

«Bizdiń qalamyz, elimiz - ol bizdiń úlken úıimiz. Ár azamat qala tazalyǵyna úlesin qosý kerek. Biz kommýnaldyq qyzmetkerlerge osylaı kómekteskimiz keledi. Búgin biraz qalyń qar tústi. Biz bul bastamany qoldaımyz jáne de basqa áriptesterimizdi bizdi qoldaýǵa shaqyramyz», - dedi Tursynbek Qabatov. Sonymen qatar, ol estafetany «Format» tobyna, «A.I.» mýzykalyq-teatr ortalyǵy men «Astana» fýtbol klýbyna tabys etti.

Bul oraıda qar tazalaý boıynsha aktsııany volonterler únemi ótkizip turatyndyǵyn aıta ketken jón.

Esterińizge salsaq, QR Prezıdenti Qasym-Jomart Toqaevtyń tapsyrmasymen 2020 jyl «Volonterler jyly» bolyp jarııalanǵan bolatyn.