Elordada bıyl 3 mln sharshy metrden astam turǵyn úı salý josparlanyp otyr
NUR-SULTAN. QazAqparat - Elordada 2021 jyly 3 mln sharshy metrden astam turǵyn úı salý josparlanyp otyr. Qala ákimi Altaı Kólginov «Egemen Qazaqstan» gazetine bergen suhbatynda osylaı málim etti, dep habarlaıdy QazAqparat.
Qazirgi ýaqytta qalada turǵyn úı kezeginde 48 myńnan astam adam tur. Byltyr qalada 3 mln sharshy metrden astam turǵyn úı salyndy. Onyń 80% – jeke ınvestıtsııa. Bıyl bul kórsetkishti 3,2 mln-ǵa deıin arttyrý josparlanyp otyr.
«Memleket basshysynyń qoljetimdi turǵyn úı sanyn, qurylys kólemin úsh esege arttyrý týraly tapsyrmasy boldy. Ótken jyly biz bul údeden shyǵa bildik. Mysaly, jeńildikpen beriletin páter alýshylar sanatyn keńeıttik. Endi áleýmettik páterlerge tek medıtsına qyzmetkerleri men muǵalimder ǵana emes, áleýmettik salanyń basqa da ókilderi, órt sóndirýshiler, mádenıet jáne sport qyzmetkerleri, polıtsııa qyzmetkerleri de qatysa alady. Al turǵyn úı sertıfıkattarynyń somasyn 1 mln teńgeden 1,5 mln teńgege deıin arttyrdyq. Jastarǵa keletin bolsaq, Elbasynyń bastamasymen elordada «jumys isteıtin jastarǵa arnalǵan jalǵa beriletin turǵyn úı» baǵdarlamasy eki jyldan beri júrgizilip keledi», - deıdi ákim.
Nur-Sultanda 2019 jyly 2 900 áleýmettik páter berilse, 2020 jyly 7 myńnan astam páter tabys etildi. Al bıyl bul kórsetkishti 10 myńǵa deıin jetkizý josparlanyp otyr.
Qala ákimdigi áleýmettik nysandardyń «qadamdyq qoljetimdigin» qamtamasyz etýdi basty maqsat etip qoıǵan bolatyn. Altaı Kólginovtiń aıtýynsha jańa turǵyn úı kesheni salynyp berile salmaı, birinshi qabattarynda «úı mańyndaǵy dáriger» medıtsınalyq mekemelerin ashylady. Olardyń qatarynda ońaltý ortalyǵy, balabaqsha, medıtsınalyq kómek kórsetý pýnkti, polıtsııanyń tirek pýnkti jáne taǵy basqa áleýmettik nysandar bar.
