Elordada birneshe saıabaqty jalǵaıtyn velosıped joly salyndy
NUR-SULTAN. QazAqparat – Elordadaǵy Prezıdent baǵy, Trıatlon baǵy men Esil jaǵalaýy velosıped jáne jaıaý júrginshiler jolymen qosyldy. Bul týraly Nur-Sultan qalasynyń Almaty aýdanynyń ákimi Bektenbaı Esbolov málim etti, dep habarlaıdy QazAqparat tilshisi.
«Qalada aýqymdy saıabaqtardy biriktirý jumystary júrgizilip jatyr. Ol baqtar: Trıatlo, Prezıdent baǵy jáne Esil ózeniniń jaǵalaýy. Qala basshylyǵynyń tapsyrmasymen biz eki aıdyń ishinde osy baqtarty velosıped jáne jaıaý júrginshilerge arnalǵan joldardyń kómegimen biriktirdik. Qazirgi ýaqytta baqtardyń aýmaǵy sporttyń kez kelgen túrinen saıys ótkizýge múmkindik beredi», - dedi Bektenbaı Esbolov «Astana – adaldyq alańy» Facebook paraqshasynda suraqtarǵa jaýap bere otyryp.
Onyń aıtýynsha osy baqtardyń jalpy aýmaǵy 250 gektardy quraıdy.
«Salystyrý úshin aıta keteıin: Londondaǵy Hyde Park aýmaǵy 142 gektardy, al Nıý-Iorktaǵy Central Park aýmaǵy 341 gektardy quraıdy. Sonymen birge elordada biriktirilgen úsh baqtyń gazondy aýmaǵy 1,9 mln sharshy metrge jetkizildi. Bul – jalpy Almaty aýdanyndaǵy gazondy aýmaqtyń úshten eki bóligine teń. Al velosıped jolynyń qashyqtyǵy – 20 shaqyrym», - dedi ol.
