Elordada birneshe qonaq úıde urlyq jasaǵan kúdikti ustaldy
NUR-SULTAN. QazAqparat – Elordanyń krımınaldyq polıtsııa qyzmetkerleri qaladaǵy qonaq úılerde urlyqpen aınalysqan kúdiktini ustady. Bul jaıynda Nur-Sultan qalalyq polıtsııa departamentinen málim etti, dep habarlaıdy QazAqparat.
«Krımınaldyq polıtsııa qyzmetkerleri buǵan deıin sotty bolǵan 36 jastaǵy qala turǵynyn ustady. Tergeý barysynda onyń buǵan deıin jasalǵan qylmystarǵa qatysty bar ekendigi anyqtaldy. Kúdikti kúzet qyzmeti joq shaǵyn qonaq úılerdi tańdap alyp, ózine sezik túsirmeý úshin sómkemen kirip, urlyq jasap júrgen. Máselen, túski as ýaqytynda Momyshuly dańǵyly boıyndaǵy qonaq úıge kirgen. Aldymen jan-jaǵyna barlaý jasap alý úshin hollda otyryp, sodan keıin bólmelerdi tekserýge kirisken. Esigi ashyq turǵan bólmelerdiń birinde ilinip turǵan pıdjaktyń qaltasynan 260 myń teńgeden astam aqshany urlap ketken. Keıinirek bólmede qonaq úıdiń ákimshisi turatyndyǵy, esigin qulyptaýdy umytyp ketkeni anyqtaldy. Kúdiktige qatysty qylmystyq is qozǵaldy», - dedi departamentten.
Osyǵan oraı vedomstvo qonaq úı ákimshilerine kelýshilerdiń qaýipsizdigi men múlkin qorǵaý úshin táýlik boıy kúzet qyzmetimen qamtamasyz etýge, sapaly kúzet dabylyn ornatýǵa keńes beredi.
