Elordada birneshe áıeldi zorlap, baǵaly zattaryn tartyp alǵan kúdikti qolǵa tústi
ASTANA. 12 sáýir. QazAqparat /Marlan Jıembaı/ - Elordada birneshe áıeldi zorlap, baǵaly zattaryn tartyp alǵan kúdikti qolǵa tústi. Bul týraly búgin brıfıngte Astana qalalyq ishki ister departamenti memlekettik til jáne aqparat bóliminiń bastyǵy Nurdildá Oraz málim etti.
«Astana qalalyq ІІD Tergeý basqarmasynyń qyzmetkerleri Shyǵys Qazaqstan oblysynda dúnıege kelgen, elordada ýaqytsha turatyn 23 jastaǵy azamatty ustady. Jeke kóligimen adam tasıtyn kúdiktige birneshe áıeldi zorlap, tonaýmen aınalysqan degen aıyp taǵylyp otyr. Ustalǵan adam buryn sottalmaǵan, elordaǵa tabys tabý úshin kelgen. Ákesiniń avtokóligimen jolaýshylardy tasymaldaý qyzmetimen aınalysqan. Ózi Pavlodar qalasynda turady, áıeli jáne kishkentaı balasy bar», - dedi ol.
Onyń atap ótýinshe, aǵymdaǵy jyldyń naýryzynda ol elordalyq 3 áıelge zorlyq-zombylyq kórsetý jáne tonaý maqsatynda shabýyl jasaǵan. Kúdikti óz qylmysyn jábirlenýshiler túngi mezgilde kóńil-kóterý oryndarynan shyǵyp, taksıge otyrǵan kezde jasaǵan. Ol adam joq jerde kóligin toqtatyp, aldymen qarsylyq kórsetken áıelderdi soqqyǵa jyǵyp, zorlap, sońynan áıelderdiń zattaryn, aqshasyn, telefondaryn tartyp alǵan. Sońǵy jábirlenýshi «bas mıynyń jaralanýy, jabyq bas súıeginiń zaqymdanýy, bas mıynyń shaıqalýy» dıagnozymen aýrýhanaǵa jatqyzylǵan.
«Jedel-izdestirý sharasy barysynda polıtsııa qyzmetkerleri kúdiktini qolǵa túsirdi. Ustaý kezinde aıyptalýshy belsendi qarsylyq kórsetip, buraǵyshpen polıtsııa qyzmetkerin jaralaýǵa umtyldy. Avtokólikti tekserý kezinde jábirlenýshilerge tıesili aıǵaq zattar tabyldy», - dedi N.Oraz.
Onyń aıtýyna qaraǵanda, tergeý barysynda jábirlenýshiniń biri taksı júrgizýshisi «K» esimdi azamatty tanyp, shabýyl jasaǵan sol jigit ekenin aıtyp otyr. Qazirgi ýaqytta kúdiktiniń ústinen QR QK 120-baby 1-bólimi, 121-baby 1-bólimi, 178-baby 2-bólimi boıynsha qylmystyq is qozǵaldy. Kúdikti Astana qalalyq ІІD ýaqytsha ustaý ornyna qamaldy.
Osyǵan oraı polıtsııa qyzmetkerleri osyndaı jaǵdaılarǵa dýshar bolǵan nemese taksı júrgizýshileriniń shabýylyna ushyraǵan azamattar bolsa, Astana qalalyq ІІD-niń 71-63-46, 71-61-45 telefon nómirlerine nemese turǵylyqty meken-jaıy boıynsha aýdandyq ІІB habarlasýyn suraıdy.
