Elordada bireýdiń tapsyrysymen kólik urlaǵan adam Kókshetaýdan ustaldy
NUR-SULTAN. QazAqparat – Elorda polıtseıleri tapsyryspen kólik urlap áketti degen kúdikke ilingen er adamdy ustady, dep habarlaıdy QazAqparat Nur-Sultan qalasy polıtsııa departamentine silteme jasap.
Nur-Sultan qalasy polıtsııa departamentiniń «Saryarqa» aýdandyq polıtsııa basqarmasynyń qyzmetkerleri áldebireýdiń tapsyrysymen kólik aıdap áketýde kúdikti dep tanylǵan Kókshetaý qalasynyń 24 jastaǵy turǵynyn ustady.
Tergeý barysynda er adamnyń tanysy oǵan Nur-Sultan qalasynda «BMV H-5» markaly kólikti aıdap áketýge usynys jasalǵany anyqtaldy. Buǵan kelisken ol avtokólik ıesiniń mekenjaıyn alǵan. Elordaǵa kelgen jas jigit atalǵan mekenjaıdy taýyp, ıesiniń kólikti úıdiń aýlasynda qaldyrǵanyn kútken. Sosyn kólikti aıdap áketedi. Elordadan Qaraǵandy qalasyna jetip, onda baǵasy 4 mln 800 myń teńge turatyn kólikti «tapsyrys berýshige» tabystaǵan.
Tártip saqshylar jedel-tergeý sharalaryn ótkizý barysynda kúdiktini Kókshetaý qalasynyń aýmaǵynan ustady.
Atalǵan faktimen QR Qylmystyq kodeksiniń 200-baby boıynsha qylmystyq is qozǵaldy.
Polıtsııa qyzmetkerleri tergeý amaldaryn júrgizýde, avtokólikti úrlaýǵa qatysy bar barlyq tulǵalar anyqtalyp jatyr.
