Elordada bir jastaǵy bala 4-qabattan qulap ketti
NUR-SULTAN. QazAqparat – Elorda polıtseıleri qala turǵyndaryna balalardyń qaýipsizdigine qatysty eskertý jasady. Sebebi kún jylynǵannan bastap balalardyń turǵyn úı terezinen qulaýy qaýpi artady, dep habarlaıdy QazAqparat.
Jyl basynan beri elordada kópqabatty úıdiń terezesinen tórt bala qulap, bireýi mert boldy.
«18 mamyr kúni keshqurym qalalyq aýrýhananyń jansaqtaý bólimine tórtinshi qabattan qulap, aýyr jaraqat alǵan bir jasar bala jatqyzyldy. Páterde eki jastaǵy jáne bir jastaǵy qos sábıimen anasy birge bolǵan. Balalardyń anasy kir jýyp júrgende, sábıdiń biri asúıdiń ashyq turǵan terezesinen qulap túsken. Terezede moskıt tory bolǵan, al qaýipsizdik jabdyqtary ornatylmaǵan», - delingen Polıtsııa departamenti málimetinde.
Budan bólek, ótken aptada 4 jastaǵy bala 10-qabattan qulap, mert boldy.
Osy oraıda polıtseıler kóktem jáne jaz kezinde balalardyń terezeden qulaýy sekildi qaıǵyly oqıǵalar jıilep ketetinin aıtyp otyr.
Mamandar ashyq terezeniń aldynda balany qaraýsyz qaldyrmaýǵa, sondaı-aq arnaıy qaýipsizdik torlaryn ornatýǵa keńes berip otyr.
