Elordada bir úıdiń jalǵyz balasyn tepki astyna alyp óltirgen úsh jetkinshekke sot qatań úkim shyǵardy
ASTANA. Sáýirdiń 6-sy. QazAqparat /Jasulan Amanbaıuly/ - Elordada bir úıdiń jalǵyz balasyn tepki astyna alyp óltirgen úsh jetkinshek uzaq merzimge sottaldy.
Bul týraly búgin aptalyq brıfıng barysynda Astana qalalyq Іshki ister departementi Tergeý basqarmasynyń bastyǵy Ǵumar Shynybekov málim etti, dep habarlaıdy QazAqparat.
Eske sala keteıik, byltyr mamyrdyń 5-i kúni Astanada bir úıdiń jalǵyz balasy, 1993 jylǵy oqýshynyń máıiti Jeńis dańǵylyndaǵy úılerdiń arasynan tabyldy. Onyń bas súıegine keltirilgen zaqymnan kóz jumǵandyǵy keıinnen anyqtalady. Bul oqıǵa is qala Ákimdigi men Іshki ister mınıstrliginiń baqylaýyna alynǵan bolatyn.
Kóp keshikpeı, kýágerlerdiń túsiniktemeleri boıynsha jasalǵan fotorobottyń arqasynda, qylmysqa qatysy bar degen kúdikpen kámeletke tolmaǵan Eshtanov, Kárimov jáne Ábishev ustaldy. Olar tonaýshylyq jasaý oıymen jábirlenýshini soqqyǵa jyqqan.
«Sot olarǵa qatysty qatań úkim shyǵardy. Sot sheshimimen Eshtanov 11 jylǵa, Kárimov 7 jylǵa jáne Ábishev 9 jylǵa sottaldy», deıdi Ǵ. Shynybekov.
