Elordada bir úıdiń turǵyndary elektr qýaty úzilgeni úshin joldy jaýyp tastady

ASTANA. QazAqparat – Elordalyq turǵyn úı kesheniniń turǵyndary elektr qýatynyń úzilgeni úshin kólik qozǵalysyn toqtatty, dep habarlaıdy QazAqparat tilshisi.

Oqıǵa týraly aqparat áleýmettik jelilerde jarııalandy.

Astana ákimdigi bergen túsindirmede elektr qýaty apattyq sıpatta toqtatylǵany jazylǵan.

«22 tamyz kúni saǵat 18:32-de «Vostochnaıa» qosalqy stantsııasynyń 45-uıashyǵynda elektr apatty túrde ajyratylǵan. Ajyratý sebebin anyqtaý úshin jáne saldaryn úshin «Astana-AEK» AQ jedel-kóshpeli brıgadasy dereý oqıǵa ornyna shyqty. Sol kúni saǵat 23:16-da elektr qýaty qalpyna keldi. Apattyń negizgi sebebi – Tólebaev kóshesi mańyndaǵy symdardyń úzilýi», - dep habarlady ákimdik.

Sonymen birge, joldy japqan turǵyndarǵa polıtsııa zańnamany buzǵany úshin aıyppul saldy.

«22 tamyz kúni Astana qalasynyń polıtsııa departamenti joldy jaýyp tastaǵany úshin 7 quqyq buzýshyny jaýapqa tartty. Qalanyń turǵyn úı keshenderi biriniń turǵyndary elektr qýatynyń ýaqytsha avarııalyq ajyratylýyna baılanysty jol qozǵalysy erejelerin óreskel buzyp, adamdardyń ómiri men densaýlyǵyna qaýip tóndirdi. Olarǵa qatysty kólik quraldarynyń qozǵalysyna kedergi keltirgeni úshin aıyppul salynyp, QR ÁQBK 614-baby boıynsha Ákimshilik quqyq buzýshylyq týraly hattama jasaldy», - delingen elordalyq polıtsııa departamentiniń habarlamasynda.

Departament zańnamany buzbaý kerektigin túsindirip, talaptardy oryndamaǵany úshin nemese zańsyz áreketter jasaǵany úshin jaýapkershilik qarastyrylǵanyn eske salady.