Elordada bir túnde birneshe kólik urlaǵan adam ustaldy
Polıtsııaǵa birden elordanyń birneshe turǵyny habarlasyp, belgisiz bireýler Mustafın kóshesindegi úıdiń janynda turǵan kólikterdiń terezelerin syndyryp urlyq jasaǵany týraly aryzdanǵan.
Jedel-izdestirý is-sharalaryn júrgizý barysynda urlyq jasady degen kúdikti ustaldy. Ol elordanyń 20 jastaǵy turǵyny bolyp shyqty.
Anyqtalǵanyndaı, túngi ýaqytta saǵat 04.30 shamasynda qaskúnem mas kúıinde, turaqta turǵan «Honda Accord» markaly avtokólikte dabyl júıesiniń joqtyǵyn baıqap, aldyńǵy áınekti taspen uryp syndyrǵan. Ol kólikke kirip, turmystyq hımııalyq zattardy urlaǵan. Biraq bul oǵan jetkiliksiz bolyp kórindi jáne ol taǵy úsh kólikten dál osylaı urlyq jasaǵan. Jas jigit qolyna túskenniń bárin urlaǵan: avtomagnıtoladan bastap balyq aýlaıtyn qarmaq pen kúnnen qorǵaıtyn kózildirikterge deıin alyp ketken.
Atalǵan fakti boıynsha QR QK 188-baby boıynsha sotqa deıingi tergeý amaldary júrgizilýde. Ustalǵan adam kinásin moıyndady, ol ýaqytsha ustaý ızolıatoryna qamaldy.