Elordada bir táýlikte 53 ret terek mamyǵynyń órti sóndirildi
NUR-SULTAN. QazAqparat – Elordalyq órt sóndirýshiler terek mamyǵynyń janýyna baılanysty bir táýlikte 53 ret órt oryndaryna bardy, dep habarlaıdy QazAqparat tilshisi.
«Qazgıdromet 25-26 mamyrda qaladaǵy aýa temperatýrasynyń 36 gradýsqa deıin kóteriletinin eskertti. Qaladaǵy qurǵaq ystyq kún raıynan órt qaýpi kúsheıe túsedi. Sonymen birge, terekter mamyǵy jaǵdaıdy kúrdelene túsedi. Tirkelgen oqıǵalardyń kópshiligi adam kinásinen bolǵan. Bir ǵana 24 mamyrda Nur-Sultan qalasy Tótenshe jaǵdaılar departamentiniń Órt sóndirý bólimsheleri terek mamyǵynyń janýyna baılanysty 53 ret órt oryndaryna shyqty», - dedi Nur-Sultan qalasy TJ Departamenti memlekettik órt baqylaý basqarmasynyń basshysy Erkin Otarǵalymuly.
Atap aıtqanda, halyqtyń otty abaısyz paıdalanýy, temekiniń, sirińkeniń shalasy órtke ákep soqtyqtyrady. Sondaı-aq, balalar da qyzyq úshin terek mamyǵyn órtep jiberedi.
TJ departamenti terek mamyǵy órtin boldyrmaý jáne azaıtý maqsatynda kommýnaldyq qyzmetterdiń, páter ıeleri kooperatıvteriniń aýlalardy, trotýarlardy, sondaı-aq ottyń tez taralý qabiletine baılanysty terek mamyǵy jınalatyn basqa da oryndardy tazalaý jumystaryn kúsheıtý qajettigin eskertedi.
