Elordada bir táýlikte 28 mekeme karantın talaptaryn buzdy

NUR-CULTAN. QazAqparat - Elordanyń monıtorıngtik toptary karantındik shekteýlerdi saqtamaıtyn kásipkerlik nysandaryn anyqtaýda. Tipti «Ashyq» júıesi boıynsha jumys isteıtin keıbir nysandar da tıisti talaptardy saqtamaı jatady. Negizinen betperde, áleýmettik qashyqtyq, jumys tártibi jáne ózge de sanıtarlyq normalar eskerilmeıdi, dep habarlaıdy QazAqparat ákimdikke silteme jasap.

Ótken táýlikte, ıaǵnı 23 shilde kúni monıtorıngtik toptar karantındi buzǵan 28 kásipkerlik nysanyn anyqtady.

Karantın talaptary negizinen Baıqońyr aýdanyndaǵy mekemelerde saqtalmaıdy. Munda 12 nysanda sanıtarlyq normalar men jumys rejımi buzylǵany anyqtaldy. Olar: Respýblıka dańǵylyndaǵy loto klýb, «Pýsan» kafesi, «Astyqjan», «Orchestra», «Arzan», «Elsan», «Mango», «Explore», «12 aı», «Avtodom», «Alash» saýda ortalyqtary, «Bıg Shanhaı» bazary.

Almaty aýdanynda ornalasqan «Arzý» shaıhanasynda, «Semeı» kafesinde, «Alanııa», «Ankara» túngi klýbtarynda, «EHO» jazǵy barynda karantındik shekteýler eskerilgen joq.

Esil aýdanynda «Ryba Pıla», «Inforno» meıramhanalary, «Panaehalı», «Chechil Pub» barlary jáne «Quartet» karaoke-klýby belgilengen ýaqyttan keıin de jumys istep, kelýshilerdi qabyldady.

Saryarqa aýdanynyń monıtorıngtik toby 6 mekemede: «Qazyǵurt», «Shashlychok», «Dýblın», «Nırvana» kafelerinde, «PivBar» syra barynda, «Mıata» laýndj-barynda karantın buzylǵanyn anyqtady.

Tártip buzýshylarǵa qatysty jınalǵan materıaldar tıisti sharalar qabyldaý úshin aýdandyq sanıtarlyq-epıdemıologııalyq baqylaý basqarmasyna tapsyryldy.

Aıta keteıik, elordadaǵy epıdemıologııalyq ahýal áli de turaqsyz. Koronavırýspen aýyratyndar kún saıyn artyp keledi. Ótken táýliktiń ózinde Nur-Sultanda KVI juqtyrǵan 1500-den astam naýqas anyqtaldy. Elorda turǵyndary men qonaqtary, sondaı-aq kásipkerlik nysandary karantındik jáne shekteý sharalaryn qatań saqtaýy tıis.

Eske sala keteıik, buǵan deıin Nur-Sultannyń sanıtarlyq dárigerleri karantındi qasaqana buzatyn mekemelerdiń tizimin jarııalaǵan bolatyn.