Elordada bir synypta 50 oqýshy otyrǵan mektepter bar – máslıhat depýtaty
NUR-SULTAN. QazAqparat – Nur-Sultan qalalyq máslıhatynyń turaqty komıssııasynyń otyrysynda máslıhat depýtaty ári qalalyq №17 mektep-gımnazııasynyń dırektory Ramzııa Ómirbaeva elorda mektepterindegi oryn jetispeýshilik máselesin kóterdi, dep habarlaıdy QazAqparat tilshisi.
«Qaladaǵy №75 jáne №59 mektepterde 3,5 myńǵa deıin bala oqıdy. Bul mektepterdiń keıbir synyptarynda 50 balaǵa deıin otyr. Máseleni shuǵyl sheshý kerek. Taǵy bir másele nege qaladaǵy elıtaly úıler mektep janynan salynady, al basqa mektepter aıdalada adam turmaıtyn jerde turǵyzylady. Kelesi másele, mektepter nege eseppen salynbaıdy? Mysaly, №28 qalalyq mekteptiń janynan 300 oryndyq qosymsha ǵımarat paıdalanýǵa berildi, al bul mektepke negizinen 500 balaǵa arnalǵan ǵımarat kerek», - dedi R. Ómirbaeva máslıhat otyrysynda.
Sondaı-aq, depýtat bas qaladaǵy eski mektepterdi jańalaý máselesi kezek kúttirmeıtin problema ekenin aıtty.
«Tıisti normatıvke sáıkes astanalyq mektepterdiń kóbinde ár oqýshyǵa 15,2 shashy metr jer bólinedi. Al qosalqy ǵımarattar qajettilikke baılanysty emes, sol nysannyń salyný qurylysy men aýmaǵyna baılanysty eseptelinip turǵyzylady», - dep jaýap berdi Qalalyq qurylys jáne turǵyn úı saıasaty basqarma basshysynyń mindetin atqarýshy Alekseı Mıtkın depýtat saýalyna.
Odan bólek, qalalyq máslıhat otyrysynda aldaǵy jyldary jańadan taǵy 3 mektep salynatyny týraly aıtyldy. Ákimdiktiń deregine sáıkes, ol mektepter «Hanshatyr» OSO-nyń janynda, jańa vokzal mańynda jáne bireýi sol jaǵalaýdaǵy «Nova-Sıtı» turǵyn úı qurylysynyń janynan turǵyzylady.
