Elordada bir kúnde alty kıberqylmys ashyldy
Elorda aýmaǵynda kıberqylmysty ashýǵ onyń aldyn alý jáne boldyrmaý maqsatynda «Hi-Tech» jedel-aldyn alý sharasy ótkizilip jatyr.
Sharany ótkizgen bir kúnde 6 kıberqylmys anyqtalyp, ashylǵan. Sonyń ishinde negizgisi – ınternet alaıaqtyq. Atalǵan qylmysty jasaǵan 4 tulǵa ustaldy.
Mysaly, jarnama arqyly habarlasqan adamdarǵa ózderin páter ıeleri dep tanystyryp, uzaq ýaqytqa «jalǵa bergen», tólemdi elektrondy ámııanǵa salǵyzǵan, al is júzinde bul páterlerge esh qatysy joq 32 jastaǵy áıel men 18 jastaǵy jigit ustalǵan.
Alaıaqtar aqshasyn tóletken soń, jarnamany joıyp jiberip, baılanys quraldaryn óshirip otyrǵan.
Budan bólek, polıtsııa qyzmetkerleri mıkroqarjy uıymynda joǵalǵan jeke kýálik arqyly 162 myń teńgege onlaın-nesıe rásimdegen 39 jastaǵy áıeldi ustady.
Kúdikti óz kinásin tolyq moıyndady. Ustalǵan adamdardyń keltirgen shyǵynynyń jalpy somasy 600 myńnan astam teńgeni quraǵan.
Barlyq faktiler boıynsha QR Qylmystyq kodeksiniń 190-baby (alaıaqtyq) boıynsha sot aldyndaǵy tergeý amaldary ótkizilip jatyr.
Nur-Sultan qalasynyń polıtsııa departamenti ınternet-alaıaqtyqtyń odan da kóp taraǵan túrleri týraly eskertýde.
Olardyń arasynda áleýmettik jeli men saýda alańdarynda ótkiletin onlaın-mámileler de bar.
Alaıaqtar qolynaan zardap shekpeý úshin aqparattyń shynaıylyǵyna kóz jetkizip, banktiń resmı koll-ortalyqtaryna telefon shalý kerek.
Bógde tulǵalar, sonyń ishinde bank qyzmetkerlerine bank kartochkalarynyń rekvızıtterin aıtýǵa bolmaıdy.
Bank qyzmetkerleri karta paıdalanýshylarǵa telefon shalmaıtynyn jáne málimet jınamaıtynyn bilgen jón.
Eger Siz onlaın satyp almaq bolsańyz, aldyn ala tólem jasaýǵa asyqpańyz.
Taýardyń bar ekenine jáne onyń sapasyna kóz jetkizip, sondaı-aq ınternet-dúken týraly pikirlerdi bilgen jón. Satýshydan taýardy beıneúndeý boıynsha kórsetýin surańyz.
