Elordada bir kúnde 21 mas júrgizýshi ustaldy

NUR-SULTAN. QazAqpart – Elordada bir kúnniń ishinde 21 mas júrgizýshi anyqtaldy, dep habarlaıdy QazAqparat tilshisi.

Nur-Sultan qalalyq Polıtsııa departamentiniń málimetinshe, «Mas júrgizýshi – qylmysker!» jedel-aldyn alý sharasyn ótkizý barysynda elordada bir kúnniń ishinde jol qozǵalysy erejesin buzýdyń 260 faktisi anyqtaldy. Onyń ishinde 21 júrgizýshi rýlge mas kúıde otyrǵany úshin ustaldy. Olardyń barlyǵy polıtsııa bólimshesine jetkizilip, sot sheshimimen 20 táýlikke qamaýǵa alyndy jáne 7 jylǵa kólik júrgizý kýáliginen aıyryldy.

Munan bólek, reıd barysynda 50-den astam jaıaý júrginshiniń jol qozǵalysy erejesin buzǵany anyqtalsa, júrgizýshiler tarapynan qaýipsizdik beldigin taqpaýǵa qatysty 30-ǵa jýyq fakti tirkeldi.

Aıta keteıik, jumadan bastap jeksenbige deıin elorda aýmaǵynda «Mas júrgizýshi – qylmysker!» jedel-aldyn alý sharasy ótip jatyr.