Elordada bir aıda 700-den astam jaıaý júrginshige aıyppul salyndy - Jol polıtsııasy
ASTANA. 10 aqpan. QazAqparat -2012 jyldyń 1 aıy ishinde Jolda júrý erejesin buzǵany úshin Astanada 700-den astam jaıaý júrginshige aıyppul salyndy, dep habarlaıdy Astana qalasy ІІD Jol polıtsııasy basqarmasynyń baspasóz qyzmeti.
JPB-nyń málimeti boıynsha, 2011 jyly Astanada oryn alǵan jol-kólik oqıǵalarynyń 45 paıyzy jaıaý júrginshilerdiń qatysýymen boldy. Jaıaý júrginshilerdiń negizgi buzýshylyqtary - kóshe qıylysyn anyqtalmaǵan jerden kesip ótý.
«Osyǵan baılanysty aǵymdaǵy jyldyń 8-10 aqpany aralyǵynda Astana qalasynda Jol polıtsııasy basqarmasy «Qaýipsiz jol» jedel-aldyn alý sharasyn ótkizýde. Atalmysh sharanyń negizgi maqsaty jaıaý júrginshilerdiń qatysýymen bolatyn jol-kólik oqıǵalarynyń aldyn alý, olardy boldyrmaý jáne eskertý bolyp tabylady», - delingen taratylǵan habarlamada.
2012 jyldyń qańtar aıyna jasalǵan taldaý kórsetkendeı, jol-kólik oqıǵalarynyń ishinde jaıaý júrginshilerdi qaǵyp ketý oqıǵalary ótken jyldyń uqsas kezeńiniń kórsetkishterimen salystyrǵanda 12,8 paıyzǵa az. Jyl basynan beri jolda júrý erejesiniń talaptaryn buzǵany úshin shashamen 800-ge jýyq jaıaý júrginshige aıyppul salyndy.
Olarǵa 5 aılyq eseptik kórsetkish (8090 teńge) mólsherinde aıyppul qarastyryldy. Erejeni júıeli túrde buzǵandar 15 aılyq eseptik kórsetkish (24 270 teńge) mólsherinde aıyppul tóleıdi nemese úsh táýlikke ákimshilik qamaýǵa alynady.
