Elordada byltyr 17 myńnan astam adam jumyspen qamtyldy
ASTANA. KAZINFORM – Elordada Eńbek mobıldiligi ortalyǵynyń dırektory Oljas Omar Kommýnıkatsııalar qyzmetinde ótken brıfıngide 2025 jyldyń qorytyndysy boıynsha halyqty jumyspen qamtý baǵytynda atqarylǵan jumystar týraly málimdedi, dep habarlaıdy elorda ákimdiginiń resmı saıty.
Ulttyq statıstıka bıýrosynyń derekterine sáıkes, 2025 jyldyń úshinshi toqsanynda Astanadaǵy jumyssyzdyq deńgeıi 4,3 paıyzdy qurap, respýblıkalyq kórsetkishten tómen bolǵan.
– Qazirgi tańda Astanada jumyssyz retinde tirkelgen 15 068 adam bar, olardyń 5 292-si – jastar. 11 myńnan astam azamat jumysynan aıyrylýyna baılanysty áleýmettik tólem alyp otyr, al 1 947 adam jumyspen qamtýdyń belsendi sharalaryna qatysyp jatyr, - deıdi ortalyq dırektory.
2025 jyldyń qorytyndysy boıynsha jumyspen qamtý sharalarymen barlyǵy 17 146 adam qamtylǵan. Onyń ishinde 3 145 adam turaqty jumys oryndaryna ornalastyrylǵan. Sonymen qatar 3 253 adam qoǵamdyq jumystarǵa, 1 052 jas jastar praktıkasyna, 260 adam áleýmettik jumys oryndaryna jiberilgen. «Kúmis jas» jobasy aıasynda 798 adam eńbekke tartylǵan.
Oljas Qoblandyulynyń aıtýynsha, kásipkerlikke baýlý men oqytý baǵytynda da naqty nátıjeler bar.
– «Bastaý Bıznes» jobasy boıynsha 3 209 adam oqytylyp, 126 azamat jańa bıznes-ıdeıalaryn iske asyrý úshin memlekettik grantqa ıe boldy. Skills.enbek.kz portalynda onlaın-oqytýdan 1 969 adam ótti, - dedi ol.
Jyl qorytyndysynda Astanada 84 044 jańa jumys orny qurylǵan. Onyń 76 544-i turaqty, al 7 500-i ýaqytsha jumys oryndary. ENBEK.KZ portalynda 500-ge jýyq jumys berýshiden 4 myńnan astam bos jumys orny tirkelgen.
Áleýmettik osal toptardy qoldaý da ortalyq jumysynyń mańyzdy baǵyty bolyp otyr. 2025 jyldyń basynan beri ortalyqqa 2 091 múgedektigi bar azamat júgingen. Sonyń 810-y jumyspen qamtylǵan.
– Múgedektigi bar azamattardyń basym bóligi qoǵamdyq jumystarǵa, «Bastaý Bıznes» jobasyna jáne onlaın-oqytýǵa tartyldy. Bul – olardyń eńbek naryǵyna beıimdelýine múmkindik beredi, - dep atap ótti Oljas Omar.
Ataýly áleýmettik kómekke qatysty da oń dınamıka baıqalady. 2025 jyly AÁK taǵaıyndaý úshin 18 548 otbasy ótinish bildirgenimen, sonyń tek 1 729 otbasyna ǵana kómek taǵaıyndalǵan.
– Aldyńǵy jyldarmen salystyrǵanda ataýly áleýmettik kómekke táýeldilik azaıyp keledi. Bul – jumyspen qamtý sharalarynyń tıimdiligin kórsetetin mańyzdy kórsetkish, - dedi ortalyq basshysy.
Aıta keteıik, 2023 jyly AÁK alý úshin 27 911 otbasy júginse, 2024 jyly bul kórsetkish 19 635 otbasyǵa deıin tómendegen.