Elordada bilim nysandaryna beriletin memlekettik tólemder qaıta qaralady
NUR-SULTAN. QazAqparat – Elordada jańa mektepterdiń iske qosylýyna baılanysty bilim berý nysandaryna beriletin memlekettik mindetteme tólemderi qaıta qaralady. Bul týraly Nur-Sultan qalasy bilim basqarmasy bastyǵynyń mindetin atqarýshy Narıman Elamanov málim etti, dep habarlaıdy QazAqparat tilshisi.
«Esil aýdanynda jańa mektepter paıdalanýǵa berilip, 1 qyrkúıekten bastap óz jumysyn bastady. Osyǵan baılanysty nysandardy paıdalaný merzimi 66 aıdan 60 aıǵa deıin ózgertildi. Tıisinshe, memlekettik mindettemeler boıynsha tólem kestesi qaıta qaraldy», - dedi Narıman Elamanov Nur-Cultan qalasy máslıhatynyń bıýdjet, ekonomıka, ónerkásip jáne kásipkerlik máseleleri jónindegi turaqty komıssııasynyń otyrysynda.
Sondaı-aq ,ol memlekettik-jeke menshik áriiptestigi aıasynda salynǵan nysan qunynyń tómendeýine baılanysty «№1» JShS únemdelgen 10,9 mln teńgeni bıýdjetke qaıtaratynyn aıtty.
Buǵan deıin Nur-Sultan qalasynyń kólik jáne jol-kólik ınfraqurylymyn damytý basqarmasynyń basshysy Jansultan Saparbaev elorda kóshelerin kútip ustaý úshin qansha qarajat kerek ekenin aıtqan bolatyn.
«Kelesi jyldan bastap elorda kóshelerin ortasha deńgeıde jóndeýge bólinetin qarjy lımıtin kóterýdi surap otyrmyz. Buǵan deıin jyl saıyn kóshelerdi ortasha jóndeý jumysyna 5 mlrd teńge bólinip keldi, bıyl ol soma 8 mlrd teńgege deıin ósti. Endi 2022 jyly bólinetin qarjy kólemin 10 mlrd teńgege arttyrýdy suraımyz. Bul qarajatqa qalanyń 100 kóshesin ortasha jóndeýge bolady», - dedi ákimdik ókili.
